‘Meneer Rossini’ forsa grandi tras di Aruba su exito Carnavalesco

Friday, 27 July 2012 08:12

E grupo di Carnaval Arubiano “Kingdom Under The Sun” ta un di e participantenan mas exitoso den e Zomercarnaval cu tur aña ta tuma lugar na Rotterdam.

Den e diez aña di existencia di e grupo di Carnaval aki, nan a logra di bai cu e corona di Reina di Zomercarnaval pa cuater biaha caba; a gana varios biaha diferente premio y tambe premionan pafor di frontera di Hulanda – manera ta e caso na e evento di Carnaval mas grandi di Europa, Notting Hill – . E forsa grandi tras di e grupo di Carnaval “Kingdom Under The Sun” ta e conocido Arubiano Rossini van Wijk, mihor conoci como ‘meneer Rossini’. “Si bo ta bin di Aruba, carnaval ta den bo sanger. Prome cu bo por cana, ya bo ta riba un carosa tur na slinger den e parada di mucha. Asina cu bo por cana bo ta den un grupo di Carnaval.”

Tempo cu ela bini pa prome biaha Hulanda immediatamente ela afilia su mes na un grupo di Carnaval. “ Di regreso na Aruba mi a concentra mas ariba diseña trahe di Carnaval, tin biaha pa mas cu 200 persona.”

Pa hopi tempo Rossini a bai bin cu regularidad entre Aruba y Hulanda. Cinco aña na Aruba, sigi pa cinco aña na Hulanda y un biaha mas cinco aña na Aruba. Mientrastanto e ta bibando na Amsterdam mes hopi tempo cu e grupo “Kingdom Under The Sun” ta existi. “Mi ta purba di bai Aruba pa Carnaval mas hopi cu mi por, pero tin biaha mi mester ta na un otro pais cu Carnaval. Semper tin un lugar na mundo cu ta celebra Carnaval. Na 2014 sigur lo mi ta na Aruba pa celebracion di 60 aña di Carnaval di Aruba. Mescos cu na 2004 pa celebracion di cincuenta aña di Carnaval, nos lo bai Aruba aki dos aña cu henter e grupo di Carnaval.”

Na Hulanda sr. Van Wijk no ta unicamente exitoso cu Carnaval. Asina bo ta haya cu participantenan Hulandes na e eleccion di Miss Mundo, Miss Universo, Miss Turismo, Miss Globe y Miss International, frecuentemente ta cana den un diseño di Rossini van Wijk. Ya pa di seis biaha ela logra gana e premio di ‘Best Costume’. “Talento? Si bo kier yame asina… Ami ta haye leuk pa ta creativo. Mi ta haye fascinante pa duna contenido na e fantasia di hende y di mi mes den un diseño,” segun sr. Rossini. Ariba e pregunta si e tin un nanishi pa Reinanan di Carnaval, cu un sonrisa e ta revela su secreto: “Ami ta busca unicamente den mi mesun grupo. Esakinan tur ta personanan di famia Arubiano, cu a lanta cu Carnaval. Ya caba mi sa ken ta nos Reina di Carnaval pa otro aña, aki dos aña y sigi asina.” Rossini ta masha entusiasma ariba Joanne Lopes cu diasabra lo habri parada. “Un mucha muher tremendo. E ta pret, e ta pasion, e ta musica y e ta Aruba. Joanne ta e personificacion di Carnaval.”

E preparacionnan pa e Zomercarnaval a cuminsa na final di februari. Den e lunanan di juni y juli tur e tempo liber – Rossini den su bida diario ta traha na frontdesk di un hotel – a bai na Carnaval. “E ta hopi trabao, bo no por imaginabo cuanto trabao. Bo tin cincuenta hende cu nan mesun caracter y ideanan. Mester traha ariba e trahenan di Carnaval, e carosa, e bailadornan y mester regla e banda musical, e transportacion, e cuido… E ta hopi stress, pero mi ta guste.” Cu apenas 24 ora pa bai, tur cos ta cla? “Ay no, nos Arubiano ta hendenan cu ta festeha, cu ta gusta na haci tur cos na e ultimo momento. Nos ta cla, na momento ora cu e musica cuminsa diasabra den e parada”.

E di 28 edicion di e Zomercarnaval ta cuminsa diabierna anochi cu e final di The Battle of the Drums. Mei anochi e Reina Joanne Lopes lo haci e apertura oficial. Pa e parada grandi cu lo cuminsa diasabra pa 1or di merdia y cu lo pasa den centro di Rotterdam, ta ser spera alrededor di 900 mil bishitante. Nan por mira cu asombro un parada di un kilometer cu ta consisti di 38 grupo di Carnaval y en total dos mil participante den trahenan colorido. E Zomercarnaval den su forma actual a cuminsa na 1984 dor di un grupo di Arubiano y Antiano cu tabata haya falta di e Carnaval di cas.