Entrevista cu Joanne Lopes, Zomercarnaval Queen 2012

Friday, 27 July 2012 08:37

“Mi ta stima Aruba, pesey mi ta bai promove Aruba unda y cuanto cu mi por.” E aña cu ta bin Joanne Lopes di 22 aña di edad, tin tur oportunidad pa haci esaki. Como Reina di Zomercarnaval 2012 elo bishita hopi pais y lo no laga ningun oportunidad bai perdi pa e conta con orguyoso e ta ariba su raiz Arubano.

“Pesey mi a bira asina emociona e siman aki na un recepcion pa mi na Cas di Aruba, na momento cu Minister Plenipotenciario sr. Edwin Abath a nami e pin cu bandera di Aruba. Mi a haya esaki asina bunita.” Hopi lagrima a cai tambe siman pasa diasabra durante di e anochi final di eleccion di Reina di Zomercarnaval ora cu Joanne a bai cu e titulo. “Pa binti minuut mi hayami ta yora y hari tras di otro.”

Apesar di un bon preparacion Joanne di antemano no tabata sigur di su caso. “Mi tabata hopi nervioso. Pa hopi aña mi tabata wardando ariba e oportunidad aki. Finalmente ela yega asina leu. E tabata hopi emocionante, pero mi a goza dje. Naturalmente mi tabata spera di a gana tambe. Durante di mi show mi a duna tur di mi mes. Mi mes tabata hopi satisfecho cune y na final mi a pensa: mi show tabata bon, awor mester warda ariba e decision di hurado.” E raport di e hurado tabata hopi cla: Asina un reina mester ta, innovativo y un tiki tradicional.”

Como yui muher di mayornan Arubiano, Joanne a ser lanta for di chikito cu Carnaval. “Carnaval ta den mi sanger. Ami ta Carnaval. Entretenimento ta mi bida. Esaki ta di tempo cu mi tabata jong. Primeramente como mayoret y despues como ‘cheerleader’. Esenario ta mi cas.” Esaki ta splica tambe e lista largo di actividadnan. Joanne ta toca saxofon, e ta canta, e ta modela pa un marca di lingerie conoci, e ta actua (entre otro den algun novela ariba television) y casi mitar di su bida e tabata reina di Carnaval, manera tabata e caso na 2008 caminda cu ela keda eligi como Reina di ‘Rio aan de Rijn’. Mei mei di tur esaki, Joanne ta traha ariba un boto di tour y den un restaurant na Amsterdam, cuidad unda actualmente e ta residencia. Un otro pasion di Joanne ta velocidad: di jetski te cu core ariba un quadracer. Awor cu ela caba su estudio den e ramo di Turismo y Recreacion elo kier haci entretenimento su profesion. “Preferiblemente rond di mundo. Cuminsando na Hulanda y despues sigi den exterior. Basta cu mi por entretene. Durante di mi stage mi a traha como host ariba e Kukoo Cunucu Partybus na Aruba. Mi a haya esey fenomenal. Mi stage a dura seis luna, pero despues di esey mi a keda traha eynan un aña mas.

Diasabra 28 di juli elo encabeza hunto cu e grupo di Carnaval ‘Kingdom Under The Sun’ e parada grandi cu lo conta cu 38 grupo y un total di 2000 participante cu lo pasa den centro di Rotterdam. “Mi ta sinti e adrenalina caba core den mi ader. Mi ta sintimi di berdad wow!” Joanne no ta mira esaki como un obstaculo, pasobra esaki ta di diez aña cu e ta participa. Despues di e fin di siman aki elo representa Zomercarnaval durante di un aña na Hulanda, como tambe den exterior, entre otro na e famoso Carnaval di Notting Hill. “Mi ta bai haci mas promocion posibel pa Carnaval. Y tambe pa Aruba.” Pa loke ta trata promocion pa Aruba, por bisa cu Joanne durante e par di dia cu e ta Reina di Zomercarnaval, ela logra haya hopi atencion. Nunca antes un Reina di Zomercarnaval a haya asina hopi atencion den medionan di comunicacion, manera ta e caso cu Joanne. “Un cos so mi por haci ta disfruta dje.”

E di 28 edicion di e Zomercarnaval a cuminsa diabierna anochi cu e final di The Battle of the Drums. Mei anochi e Reina di Zomercarnaval 2012 Joanne Lopes a haci e apertura oficial. Pa e parada grandi cu diasabra ta cuminsa 1or di merdia y cu ta pasa den centro di Rotterdam, ta spera alrededor di 900 mil bishitante. Nan por mira cu asombro un parada di un kilometer cu ta consisti di 38 grupo di Carnaval y en total dos mil participante den trahenan colorido. E Zomercarnaval den su forma actual a cuminsa na 1984 dor di un grupo di Arubiano y Antiano cu tabata haya falta di e Carnaval di cas.