Parlamentario Juan David Yrausquin a haya splicacion amplio: Parlamento di Brazil a presenta concepto di ley "Entrada Basico"

Sunday, 29 July 2012 17:19

Miembro di Parlamento Juan David Yrausquin a atende reunionnan di Parlatino na Corsou, den su calidad di miembro di e comision economico di Parlamento Latino Americano. Otro miembronan di Parlamento di Aruba, manera mr. Andin Bikker y mr. Desiree Croes tambe a atende e reunionnan, pero den otro comisionnan, manera ta esun di energia y esun di derechonan humano.

Mas o menos 60 delegado for di henter Latino America a topa na Corsou pa e reunionnan di Parlatino cu a tuma luga den Renaissance Resort. Un di e sesionnan cu mas a hala atencion tabata e presentacion di Senador Eduardo Suplicy di Brazil. Ta trata aki di un miembro di e Parlamento Brasilero cu algun tempo atras a presenta un proposicion di ley di "Entrada Basico" na Brazil y cu a conta cu sosten unanime. E concepto di ley aki a pasa na vigor, pero ainda no ta aplica. Ta discutiendo con lo financia e formula, den cual tur ciudadano ta ricibi un entrada basico y riba dje ta bini nan salario. Esun cu a presenta e ley aki tabata na Corsou pa conta di e exito di e concepto aki. Eduardo Suplicy di 71 aña di edad ta un economista, profesor universitario y alabes tabata maneha empresanan grandi prome cu el a asumi e funcion di miembro di Parlamento di Brazil, afilia na e "Partido de los Trabajadores". Desde aña 1978 a eligi'e como diputado estatal y na aña 1982 a keda eligi como diputado federal. Desde aña 1991 e ta Senador (Parlamentario) na Brazil, formando parti di un coalicion conoci como "Mejor para São Paolo", forma pa e partidonan PRB, PT, PL y PC do B. E concepto di ley "Entrada Basico" na Brazil, ta deriva for di e "Alaska Permanent Fund" cu ta un fondo estableci constitucionalmente y maneha pa un entidad semi independiente desde aña 1976 caba. Na Alaska a pasa un ley den cual ta inverti 25% di tur entrada genera dor di exploracion di gas y petroleo den e estado ey. E fondo aki ta bay bek na comunidad anualmente den forma di un bonus cu anualmente ta varia entre $900 y $1800 pa persona pa aña. Na aña 1977 nan a crea e fondo cu $734.000. El a sa di crece den añanan cu a sigui te cu na october 2011 e fondo ta conta cu inversionnan balora na 38 biyon Dollar Mericano! E sistema aki nos no conoce den Reino Hulandes y no ta mucho popular ainda na otro paisnan na mundo. Na Alaska e ta funciona tremendo, pero ta bini netamente for di exploracion di productonan petrolero y gas. Den Reino Hulandes, e unico forma di entrada basico cu nos conoce ta pa nos grandi nan, den forma di e pensioen di AOV y e "Bijstand" pa esunnan cu no tin un entrada mensual. Pero asina mes, e "Bijstand" ta mara na condicionnan, pues no ta pa tur hende! Despues di e presentacion na Corsou, Parlamentario Juan David Yrausquin di Partido AVP a bisa cu e ley aki ta masha interesante, specialmente pa nos na Aruba cu awor ta den proceso pa cuminsa cu exploracion di gas den nos awanan teritorial. Den caso cu nos isla ta bendiciona cu gas natural den nos sub suelo, mesora henter e situacion riba nos isla lo cambia. Cu un ley asina lo por sigura pueblo cu nan lo ricibi nan "fair share" di e rikesa di nos pais. Alaska por ehempel, ta e estado Mericano cu e miho reparticion di entradanan bou di e pueblo, danki na e ley aki cu awor Brazil lo aplica. "E no ta algo pa nos haci mañan, pero si e ta un ley cu nos mester conoce y ta consciente di dje y hasta lo mi bisa pa nos pensa riba dje pa Aruba tambe", asina Parlamentario Juan David Yrausquin a duna di conoce despues di a caba di scucha e presentacion di e Senador Brazilero durante e reunion di comision economico di Parlatino na Corsou.