Digicel ta orguyoso pa anuncia: Special Olympics Aruba ta bay Surinam pa competi na weganan internacional

Monday, 30 July 2012 14:13

Como e sponser principal di Special Olympics Aruba, Digicel ta orguyoso pa anuncia cu e atletanan Jeremiah Ellis, Diana Mariana, Esmeralda Yarzagaray, Francis Croes, Anouska Issei y Andre Geerman lo biaha pa Surinam dia 1 di augustus pa un competencia internacional cu ta tuma luga ariba dianan 4 y 5 di Augustus.

E hobennan di Aruba lo competi na e Suriname National Games 2012 na Paramaribo, unda nan lo midi forsa contra atletanan di diferente ciudad di Surinam, como tambe Boneiro, Curacao y Sint Maarten den e disciplinanan di atletismo y bollas criollas.

"Nos ta invita tur fanatico y amigonan di nos atletanan special pa uni nan mes na Digicel y desea nan hopi exito. Nos amigonan di Special Olympics ta demostra energia, gran disciplina y determinacion durante cada un di nan trainingnan y nos ta convenci cu nan lo bolbe Aruba exitoso," Tuyo Werleman di Fundacion Special Olympics Aruba a bisa cu entusiasmo.

Durante e temporada cu a pasa, Special Olympics Aruba a celebra tambe nan Siman di Conscientisacion, unda cu nan a organisa diferente actividad y a invita pueblo di Aruba pa bin wak nan train y hasta pa participa hunto cu nan na diferente wega, como tambe algun actividad di canamento. Hasta miembronan di prensa a disfruta di un wega di Bolas Criollas y mayornan y asociadonan di Digicel hunto cu Gerente General Remko van der Veldt a participa na entre otro algun actividad di canamento y a para grita, fluit y bati man pa anima nos atletanan.

Nos atletanan:

E delegacion di Aruba ta consisti di tres atleta femenino y tres atleta masculino cu ta determina di un biaha mas mustra e forsa y habilidad di Special Olympics Aruba den exterior. Cera conoci cu nos atletanan cu ta bayendo Suriname:

Jeremiah Ellis a cuminsa core cu Y-Track na 2008 y na 2009 el a bay cu Y-Track Curaçao pa participa den coremento. E mesun aña el a participa na diferente careda na Aruba y na 2010 el a representa Aruba na Special Olympics den e disciplina di coremento na Puerto Rico, unda el a gana medaya di brons. Jeremiah ta sigui activo den e bon di Y-Track y ta biahando pa Suriname cu e fundacion Special Olympics.

Andre Geerman a representa Aruba na Irlanda, como tambe na Jamaica den e disciplina di atletiek. Andre ta un persona hopi entusiasma cu deporte y ta train tur siman na Centro Guillermo Trinidad na Dakota.

Diana Mariana y Esmeralda Yarzagaray ta dos atleta cu semper a atende tur training di Special Olympics Aruba fielmente for di e tempo cu e fundacion a wordo estableci. Nan ta yega di gana diferente medaya na Aruba y ta determina di bolbe for di Suriname cu mas medaya, asina sacando cara di Special Olympics Aruba y nos isla den exterior tambe.

Francis Croes ta un atleta cu ta cay den e categoria di "superactivo" segun dirigentenan di Special Olympics Aruba. Francis tin hopi experiencia nacional y internacion den su deporte faborito di Bolas Criollas. El a demostra su tecnica y control sigur, na momento cu el a prueba cu no tabatin pa igual'e na Puerto Rico, asina ganado diferente medaya di oro.

Anouska Issei ya a logra gana diferente competencia na Aruba. Ora el a bay Puerto Rico y Irlanda el a demostra cu ariba tereno internacional tambe e ta sigui cu su enfoke y determinacion y a logra gana diferente medaya. Anouska tin un pasion grandi pa su deporte y ta sigui purba mehora su habilidad continuamente.

"Nos atletanan special ta bolbe Aruba dia 6 di augustus, unda cu nos lo tey pa ricibi nan cu un caluroso bon bini, digno di e celebridadnan cu nan ta!" Sr. Werleman a bisa.

Jeremiah, Diana, Esmeralda, Francis, Anouska y Andre nos ta desea boso hopi exito!

END