| Lysander Besselink: Dialogo Social a demostra di ta bon pa Aruba |
 |
 |
| Monday, 30 July 2012 17:30 |
 Si nunca bo por a dialoga na un manera sano y mucho menos bo tawata un persona berdaderamente social, ta di compronde e motibo dicon bo tin un actitud negativo contra di cos nan cu realmente ta positivo y na bienestar di nos Pais. Pa splica en corto e importancia di tin un Dialogo Social, Dialogo Social ta algo integral y crucial cu ta forma parti di e maneho di gobierno actual y es nan cu ta forma parti di e dialogo social no tey solamente ora cu mester tuma decisionnan pisa of dificil. Tur es nan cu tin pais Aruba na pecho ta participa na e Dialogo Social aki y di nan banda, a tuma nota cu nan sigur kier aporta na cosnan bon y positivo tambe pa nos pais. Un di e decisionnan positivo cu lo bay wordo tuma den e dialogo social siguientemente ta, pa baha e tarifa di awa y coriente pa pueblo di Aruba. Ta bon pa recorda cu den pasado na momento cu WEB NV a propone pa bin cu un subida den cobransa di 22% di coriente, gobierno actual por medio di Prome Minister Mike Eman y Minister Mike de Meza, a bisa cu esaki ta demasiado halto como tambe iresponsabel pa haci,pa e simpel motibo cu e subida aki sigur lo afecta e stabilidad socio-economico e tempo ey. Pues esaki tawata un decision atrobe na fabor di pueblo Arubano, cual decision gobierno di MEP hamas lo por a tuma na beneficio di pueblo aki. Pero tumando e paso aki e tempo ey, gobierno actual a bay den un Dialogo Social cu e topico di energia pa discuti un posibel aumento pero di un forma responsabel, mirando cu e prijs internacional di zeta tawata subi continuamente. Den e reunionnan aki a wordo papia kico ta cargabel pa e economia di pais Aruba como tambe pa e consumidor. E instruccion na final di e dialogo social a bira, cu Raad van Commissaris di Utilities, WEB como tambe ELMAR mester a traha un bedrijfseconomisch analyse. Despues cu esaki a wordo haci, a convence e lendernan e tempo ey cu lo subsidia e consumidor 4 pa 6 luna y lo dura algun luna pa recobra e placa aki bek pa tanto WEB como ELMAR por cumpli cu nan debernan financiero. Pues na un manera responsabel y teniendo pueblo na pecho, e subida proponi dor di WEB NV anterior, esta esun di 22%, no a bay dor y esaki danki na un Dialogo Social.Mester remarca si, cu si tuma na cuenta e conversion nan cu WEB NV a haci y cu ta den periodo di prueba awor como tambe e Parke di Molina di biento na Vader Piet, como tambe e mercado internacional relaciona cu e prijs di crudo cu a baha y sigur tumando na cuenta cu Gabinete Mike Eman a bisa WEB cu ELMAR pa nan keda cu e dividendo cu mester bay den caha di gobierno, cu tur esaki ta loke cu a yuda mantene e prijs di tanto awa como coriente abou e ultimo 2 aña ‘i mei y e bon noticia ta cu pronto pueblo lo haya reduccion tambe den e tarifa. Pesey mes cu no por compronde MEP cu ta grita pa baha awa cu coriente siendo cu ta nan propio gobierno ta esun cu a chica WEB cu ELMAR algo mas di 240 miyon florin na dividendo, cual ta forma parti di e suma cuantioso di 4 biyon florin cu te ainda nan no por para responsabel completamente pe. Mientras cu nan a adkiri tur e placa aki, ni e decencia di haci e intento pa baha e costo di awa cu coriente nan no tawata ta tin, corda e boluntad. Pesey mes, cu tumando na cuenta e bon decision cu gobierno actual, conhuntamente cu otro partnernan di dialogo social a tuma inicialmente a pone cu na e momentonan aki WEB a anuncia caba cu nan a recobra e perdida cu nan tabatin aña pasa, como tambe nan a informa gobierno cu e momento a yega cu nan por duna un rebaho di e tarifa di awa y coriente. Maske cu a compronde si, cu ELMAR mester recobra un parti di su perdida ainda, pero asina mes esaki sigur ta un bon noticia pa nos comunidad. A compronde cu awor atrobe Gobierno di Aruba ta bay tin un Dialogo Social pa dicidi den ki forma ta structura e rebaho di awa y coriente como tambe, e manera con ta bay structura e tarifanan di coriente y awa pa futuro. E bon noticia ta cu e rebaho aki ta bay ta substancial y lo core den mas o menos 20%. Pues e fruto positivo di e Dialogo Social ta bisto. Pesey mes ta na su lugar pa yama un danki special na tur es nan cu si ta Pro-Aruba y ta kere den Dialogo Social. |
Mustra/Kita e formulario di comentario
