| Comedia “Potmoni” e weekend aki ta pa un bon causa pa PoetsTV su proyectonan nobo |
 |
 |
| Thursday, 02 August 2012 09:22 |
|
E conocido Jan Poets di PoetsTV a duna di conoce cu e meta tras di e comedia “Nan ta biba den mi Potmoni”, cual comedia lo ser presenta diabierna y diasabra proximo den Cas di Cultura, lo ta pa recauda fondo pa cumpra equiponan nobo pa asina PoetsTV ta bon prepara pa su dos proyectonan nobo den futuro cercano. E prome proyecto ta e show musical nobo “Poets Show” cu lo bai debuta den luna di September riba diadomingo anochi na Telearuba, cual programa lo bai ser dedica na nos artistanan local. E di dos proyecto lo ta uno sumamente interesante na bienestar di nos hoben deportistanan tanto di Little League como tambe di LIFIDA. Muy pronto Jan Poets lo bai tin su propio Mobile di transmishon y ta pendiente pa ricibi e permiso for di tanto DTZ como Minister Mike de Meza di Telecomunicacion. Danki na e dos comerciantenan Franklin Bareño di Bright Bakery y Robert Chamaly di Red Spot Lottery, kendenan lo bai sostene Jan Poets cu e Microwave transmitter. Meta tras di “PoetsTV Live Mobile”, ta pa bai transmiti weganan di tanto campeonato di LIFIDA como esun di Little League den forma enbibo pa Telearuba. Pa logra e meta aki, mester upgrade e equiponan y cu e dos anochinan di e comedia, esaki lo bai yuda hopi pa cumpra equiponan moderno pa realiza e transmishon. Tambe Jan Poets ta programa pa bai New York y realiza un cobertura den e stadion nobo di NY Yankees y asina alaves probecha pa presenta na esnan concerni un proposishon pa coopera cu PoetsTV pa realiza un campaña durante e transmishonnan di weganan di Little League pa e muchanan cu mihor a destaca un premio pa bishita NY Yankees stadium cu un pakete cu nan por sinta disfruta di e weganan y alaves haya un tour den e parke y cu e posibilidad pa topa cu e astronan di NY Yankees personalmente. E premio unico aki lo bai sirbi pa motiva nos muchanan durante e campeonato di Little League. Pa e muchanan di LIFIDA, Jan Poets lo bai trata pa logra tambe premionan pa e joven futbolistanan por bai bishita La Masia di FC Barcelona y hasta por realiza un seccion di training cu e otro prospectonan. Tambe disfruta di un wega di FC Barcelona den Nou Camp. Pues e publico cu lo bai sinta hari y goza di e tremendo comedia aki diabierne y diasabra proximo den Cas di Cultura, tambe lo coopera pa PoetsTV realiza su metanan na beneficio di nos futuro deportistanan.
Jan Poets aki hunto cu e famoso GM di NY Yankees, Brian Cashman, kende Jan Poets lo bai ofrece un proposishon pa NY Yankees garantisa premionan pa nos prospecto beisbolistanan di Little League bishita NY Yankees Stadium
|
Mustra/Kita e formulario di comentario
