Parlamentario Desirée G. Croes: Sistema Dominicano di carceleria ta hopi exitoso

Thursday, 02 August 2012 19:51

Riba diabierna, e di dos dia di reunionnan di Parlatino, Comision di Derechonan Humano, Husticia y Carceleria a bishita prison Sentro di Detenshon i Korekshon Korsou, antes Bon Futuro. Algun luna atras a bishita un prison di hende muher na Panama City, unda mas cu 70 hende muher ta sera den un lokal unda den situacion normal porta 20 persona por drumi.

Tanto e situacion hygienico como medico ta laga masha hopi di desea. Ademas, mayoria di e presonan eyden, despues di dos anja of mas sera, ainda no sa di kico nan ta wordo acusa formalmente. Na Republica Dominicana a introduci algun anja pasa un sistema carcelario completamente nobo den su estilo. E sistema ta ofrece cursonan, estudionan y diferente tipo di trabou practicamente henter dia. Pues e preso ta keda masha poco ora sera den su cel y ta pasa mayoria di su oranan hpracticando actividadnan constructivo. Condicion ta si, cu e preso mester cualifica pa por participa den e methodo aki. Den e methodo aki ta existi tambe e posibilidad pa presonan cu cualifica, por acumula puntonan na diferente manera. No solamente cu bon conducta, pero tambe cu trabaonan y cursonan durante e tempo cu nan ta sera. E puntonan acumula por wordo cambia pa reduccion di castigo. E institucion ta brinda entre otro programanan di educacion, rehabilitacion y recreacion cu acceso na servicionan di salud fisico y mental. Pues bastante diferente na prisonnan tradicionnal den nos regio. E pensamento tras di esaki ta cu for di momento cu un persona haya un condena, mester cuminsa prepara y rehabilita e preso cu e meta pa evita cu e bolbe haya su mes ta comete un crimen of mustra actitud criminal. Principal ta pa e persona aki haya tur oportunidad pa incorpora su mes na un manera productivo den comunidad. Cu implementacion di e sistema penitenciario nobo aki ta cambia e concepto di prison pa uno di un centro di coreccion y rehabilitacion. For di dia cu e sistema aki a wordo introduci na Republica Dominicana un percentahe masha chiquito- te awo menos di 10%- ta bolbe cai den bida di crimen. Compara cu otro paisnan den region unda e cantidad cu ta recidivi ta mas cu 80%, por bisa cu te awo e programa aki ta mustra di ta un exito. Desiree ta masha contento cu e informacionnan ricibi, y pronto kier intercambia di idea riba e topico aki cu nos Minister di Husticia, sr. Dowers.