| Premier Gerrit Schotte: E situacion no tabata tin areglo |
 |
 |
| Friday, 03 August 2012 20:11 | |||||||||||||||
|
Prome Minister Gerrit Schotte mustra basta cansa a sali for di oficina di Gobernador y a atende prensa. El a splica cu diahuebs anochi a tuma luga reunion di Conseho di Minister di Gabinete Schotte caminda dos decision importante pa Corsou cu a wordo tuma. E prome tabata cu a entrega retiro di su Gabinete y a traha un concepto di Decreto Gubernamental pa disolve Staten, usando articulo 53. Den oranan tempran di mainta, e politico a yega Oficina di Gobernador pa entrega un carta den cual e ta papia di e dos decisionnan cu a wordo tuma. Gobernador a pidie pa keda como un Gobierno demisionario mientras cu tur loke cu ta hinca den e concept Landsbesluit a wordo pone den ehecucion. Awor, despues cu den oranan di atardi Gobernador a dicidi di acepta e decision di e Gabinete y cu lo bay eleccion, ta keda na e instancianan concerni pa cuminsa prepara pa un proximo eleccion. E situacion no tabatin areglo despues cu sr. Rozier a bay cu un asiento di MFK, declarando su mes independiente, a haci cu no por a soluciona e problema den e Gobierno. Den e reunion di diahuebs anochi, 9 Minister a haci uzo di e derecho cu nan tin, mescos cu Parlamento por pasa un mocion di desconfiansa den direccion di Gobierno, a dicidi di baha e Gobierno den e situacion dificil. Un situacion caminda tin cinco fraccion di un persona di cual dos ta bulado di cura, pues a bay cu asiento di nan partido, siendo cu hunto nan nan tin apenas algo mas cu 500 voto. Bou di e circumstancia cu tin actualmente, e Gobierno no por carga riba nan consenshi cu e dosnan aki ta bay re-dirigi e pais. E ultimo biaha cu a haci uzo di e articulo pa disolve Parlamento a wordo haci na 1993 door di Gabinete Maria Liberia Peters. Pa proximo eleccion, Schotte ta pidi pa un Gobierno fuerte, sin compleho y e palabra ta na pueblo.
|
Mustra/Kita e formulario di comentario
