| Tormenta Tropical Ernesto ta percura pa tempo cera cu chens pa awasero |
 |
 |
| Saturday, 04 August 2012 14:41 |
 E centro di Tormenta Tropical Enersto lo pasa alrededor di 222 km pa nort di Aruba pa 3 or di atardi bayendo mas leu di nos isla den transcurso di dia. Avion di National Hurricane Center (NHC) a bula awemainta riba e ciclon a encontra un Ernesto algo debilita compara cu e manera cu e ta mustra riba imagennan di satelite.
Segun pronostico di Departamento Meteorologico di Aruba (DMA) diasabra tempo lo ta nubia cu posibilidad di algun awasero isola. Temperatura maximo lo ta den 34°C. Biento den oranan di mainta lo ta nort-nortwest cu velocidad di 5 nudo cu rafaganan te den 18 nudo. Biento lo bolter mas den atardi biniendo for di direccion west-zuidwest te zuid. Chens pa awasero ta den careda di 20% den 2 pa 8 mm. Pa diasabra atardi laat y anochi laat tin posibilidad di awasero cu chens den 30% den careda di 2 pa 8mm. Temperatura minimo lo ta den 26°C. Biento lo bin for di direccion oost-zuidoost alrededor di 13 nudo cu rafaganan te cu 25 nudo den atardi laat birando relativamente mas fuerte anochi laat te 16 nudo cu rafaganan te cu 26 nudo. Pa 10 or di anochi e centro di ciclon tropical Ernesto lo ta alrededor di 325 km nortwest di Aruba. Pa diadomingo den dia shelo lo ta nubia cu chens di awasero den oranan trempan di mainta. Temperatura maximo lo ta den 30°C. Biento lo bin for direccion oost-zuidoost cu velocidad di 19 nudo, rafaganan di 33 nudo. Posibilidad di awasero ta keda den careda di 30% den 5 pa 15mm. Pa diadomingo 10 or di mainta e centro di ciclon tropical Ernesto lo ta alrededor di 640 km west-nortwest di Aruba. |
Mustra/Kita e formulario di comentario
