|
AC Milan Junior Camp Boneiru 2012 a terminá ku un seremonia di klousura na stadion di Kralendijk den presensha di e mayornan I mandatarionan di Boneiru. E trainings Camp tabata un éksito. Diputado Kroon komo diputado di deporte a gradisí e organisábo i tur e spònsernan ku a yuda ku e training camp di AC Milan por a keda realisá aki na Boneiru komo ku ta esei ta gobièrnu di Boneiru su vishon pa nos hóbenan haña oportunidat pa desaroyá den deporte i bira konosí mundialmente.
E camp a dura un siman ku partisipashon di 90 hóben (U-11 pa U-17) di Boneiru, Kòrsou, Sint Maarten i Hulanda. Tur partisipante a risibí nan sertifikado di partisipashon despues di un siman di trabou hopi duru (den un solo hopi kayente por sierto). Tambe nan a risibí un tas di Adidas i un bala di AC Milan. E kordinashon tékniko di e siman tabata na enkargo di Alessio Spataro i Giuseppe Lo Re, dos coach ofisial di AC Milan, ku sosten tékniko di e coachnan lokal (Ronald Añes, Nafthaly Rier, Sam Janga, Alfred Ronde, Omar Semeleer), i asistentenan Maynard Cicilia i Rachid Blanken i Indebon (Chio Semeleer) a sòru pa e material i tambe bala nan ku a ser usa durante di camp. E kordinashon general na Boneiru tabata den man di Ljugene Carolina. Durante di e seremonia a anunsiá e hungadónan ku a ser selekshoná pa bishita Milan mas lat den aña. E hungadónan a resultá di ta William Plaate i Ayrton Cicilia. E hungadónan aki lo partisipá, huntu ku esunnan di Aruba i Kòrsou, na un evento yamá Milan Junior Camp Day na Milan den siman di 30 di òktober pa 3 di Novèmber 2012. Milan Junior Camp Day ta un programa ku ta keda organisá tur aña komo klousura di e diferente Milan Junior Camp nan ku ta ser organisá rònt mundu. E hungadónan lo haña oportunidat pa topa tur e otro ganadónan di Milan Junior Camp, bishita e fasilidatnan di AC Milan durante di algun dia, hunga algun wega I tambe asistí na un wega di AC Milan den stadion San Siro i sera konosí personalmente ku algun di e estreanan di AC Milan. Esaki ta e di tres biaha ku ta hiba hungadónan hubenil pa eksperensiá e aktividat aki. Komo resultado di e biaha di 2011 un hungadó di Aruba, Jesus Peñate Huguett a ser selektá pa forma parti di Milan Elite International U-14. Esaki ta un soño di diputado James Kroon i Federashon di Futbòl di Boneiru (FFB) pa buta Bonaire riba mapa internashonal di futbòl hubenil i logra ku ekiponan mundial ta kuminsá hinka Bonaire den nan programanan di desaroyo di futbòl.Tambe a anunsiá e hungadónan ku a ser pre selektá pa ekiponan ku lo representá e campnan di Kòrsou, Aruba i Boneiru (Milan Dutch Caribbean) na diferente torneo hubenil di AC Milan, entre otro Copa America (Colombia), Heartland Cup (Tulsa, Oklahoma) I Florida Cup (Florida) durante di 2012 i 2013. Tin negosashonan serio andando pa organisá un torneo hubenil internashonal di AC Milan na Boneiru den kurso di aña 2013. Riba e foto por mira e hungadónan selekshoná huntu ku e coachnan. Telbo N.V., Bonaire Wegenbouw N.V. I MNO Vervat N.V. a mustra nan kompromiso ku desaroyo optenibel di futbòl hubenil y a sostené e realisashon di e camp pa medio di sponsoring di 40 partisipante di Boneiru. Diferente otro kompania, entre otro Restaurant Zeezicht, Sunshine Minimarket, Subway i Lisa’s Convenience Store, Casa Blanca Restaurant I Obersi Electronics, tambe a duna sostenRiba e portrèt nos por mira William Plaate huntu ku e coachnan di AC Milan i momentu ku diputado Kroon ta hiba palabra i sr. Reginald Carolina i e lidernan ku a guia e kampamentu deportivi di AC Milan i esunan ku a keda selekshoná i tambe e hóben WiliamPlaate i Arton Cicilia.
 |
Mustra/Kita e formulario di comentario
