| Mensahe di Rudy Lampe na nos maestronan y otro profesionalnan |
 |
 |
| Sunday, 05 August 2012 13:56 |
|
Comunidad por confia riba bo juicio cu mester ta uno profesional, independiente di cualke presion cu por tin. Pesei mes mi a bira preocupa ora mi a lesa lo siguiente. Profesionalnan di AIB a declara tempo cu sr. Wever tabata Ministro di Salubridad Publico cu e hospital nobo ta e miho opcion pasobra e lugar actual di nos hospital entre otro lo no ta adecua. E mesun profesionalnan di AIB awor cu Minister Visser ta na mando ta declara cu e renovacion di e hospital na e lugar actual ta e miho opcion. Unda e profesionalismo a keda, of ta baila segun e minister cu ta na mando ta toca? Un ambtenaar di Censo ta procede contra e whistleblower den e caso di falsificacion di adres di un promer ministro, en vez di actua contra e delito. Profesionalnan di DOW lo a haci calculonan robez den e trabaonan di infrastructura cu ta causa retraso y perdida di placa, y arkitektonan di Linear Park a lubida cosnan elemental cu un mucha di lagere school mes sa y pesei lo e costa hopi mas placa. Mi ta puntra mi mes: ta berdad cu nos profesionalnan ni sikiera sa rekenen? Of nan ta baha cabez pa e ministro su interesnan, sea e ta berde of gel? Ki tipo di profesionalnan nos maestronan di scol ta produsi? Mi ta comparti e siguiente reflexion cu ta scirbi den un misa catolico na Viena: “Inhusticia ta exigi resistencia, husticia ta demanda apoyo. Nos rumannan a lucha contra Hitler, nos rumannan no tabata meelopers. Nos rumannan a keda deteni, pero nan a sigui lucha. Nan a sigui lucha den exterior y den nos pais. Esun cu tin conosimento di un delito, tin cu actua contra e delito.” Tipo di profesionalnan asina nos Pais Aruba tin mester, cu no ta baha cabez pa ningun minister ora e ta robez. E ta para firme pa su profesionalismo. Mi ta desea tur maestro di scol hopi exito den e tarea noble aki durante e aña escolar nobo! |
Mustra/Kita e formulario di comentario
