| Fundacion FMAA trahando huntu cu Parnassia Bavo Groep di Hulanda pa asina combati Adiccion di Droga structuralmente |
 |
 |
| Sunday, 05 August 2012 18:42 |
|
FMAA a habri su portanan oficialmente na 2010 despues cu gobierno a reorganisa tur e instancianan cu ta brinda cuido di adiccion pero tambe prevencion pa asina eleva e calidad di cuido y servicio cu ta wordo brinda. E fundacion aki a bin na realidad despues cu Stichting Sa di Droga cual tawata un stichting existente desde aña 2006, cual su miembronan tawata studiante y docente (Verslavings Onderwijs Aruba) y profesionalnan den e ramo di cuido y prevencion di adiccion, a firma un acuerdo na aña 2010 cu Stichting Alcohol Misbruik Bestrijding Aruba (SAMBA) pa cuminsa traha huntu pa asina combati e problematica aki cu mas forsa y conocemento. SAMBA na su turno ta un di e pioneronan den e ramo aki y ta existi caba desde aña 1955. Desde e periodo di Stichting Sa di Droga e grupo aki cu awor a bira FMAA a mira e necesidad caba pa cuminsa traha mas huntu y tambe e tempo ey caba a busca e sosten y coperacion di instancianan internacional riba e ramo aki na Paisnan manera Hulanda. Un di e instancianan aki cu semper a brinda tur nan expereticio y ayudo tawata ParnassiaBavoGroep y regularmente tawata tin combersacionnan andando entre e gruponan aki pa asina sondea e posibilidadnan. ParnassiaBavoGroep ta un organisacion sumamente grandi y profesional cu tin total casi 7000 empleado den e ramo di cuido y prevencion di adiccion. Tambe nan tin 8 diferente instancia cu ta brinda tur sorto di cuido y tratamento profesional na tur parti di Hulanda. Gobierno na su turno a percura tambe desde un principio pa mantene e contactonan necesario pa asina logra haya e sosten y coperacion di instancianan internacional manera ParnassiaBavoGroep pero tambe di e famoso Stichting De Hoop na Hulanda cu a yuda Aruba cu materialnan di prevencion. Mirando e necesidad na informacion y educacion den e ramo aki na Aruba, gobierno a bishita e instancianan aki na varios ocasion y a reuni cu esakinan pa asina haya nan coperacion . Tur esakinan a pone cu awe nos profesionalnan na Aruba cu tambe ta dispone di bastante experencia den e ramo aki despues di tanto aña cu Aruba ta trahando riba combatimento di adiccion/droga pronto por bay disfruta di un intercambio di conocemento profesional den e ramo aki mirando cu pronto Ministerio di Salubridad y Deporte lo anuncia oficialmente un Congreso Internacional cu lo wordo organisa conhuntamente cu ParnassiaBavoGroep y Fundacion FMAA na Aruba. Esaki despues di varios aña cu no tawata tin un congreso di e calidad y nivel halto aki pa tur esnan cu ta traha directamente of indirectamente den cuido of prevencion di adiccion. |
Mustra/Kita e formulario di comentario
