| Servicio den bario di WGK ta concentra awor na Paradera pa full Aruba |
 |
 |
| Sunday, 05 August 2012 20:08 |
|
Un di e cambionan cu a resulta di esaki ta cu e servicio di bario cu tabata duna for di na Savaneta y Noord a bay na Paradera, y eynan tur e enfermeranan cu ta concentra pa duna servicio den bario pa full Aruba. Esaki tabata necesario pa motibo cu mester a pone tur hende bao di un dak pa por coordina y dirigi mihor y duna mihor cuido na nos hendenan, segun Goeloe. WGK a pone tres consulent specializa den herida, y un enfermera titula pa haci control di pacient na cas. Den su relato anual WGK ta mustra atrobe, cu e poblacion di edad grandi ta creciendo acelera. Goeloe a bisa cu e director di CBS a bisa recientemente cu Aruba tin vergrijzing, pero WGK Goeloe tin anjanan papiando di esaki. Goeoloe a bisa cu nan tin un lista di spera, y actualmente tin 21 persona riba e lista, di cual 11 ta casonan urgente cu mester wordo yuda inmediatamente, pero WGK no tin e manpower pa duna e personanan aki e cuido necesario. Esaki ta di lamenta pasobra tur hende na Aruba tin derecho riba cuido y si Wit Gele Kruis no por duna un cuido 100% nan ta prefera bisa no, si tin cu dune 50% of 30% y WGK tin su profesionalnan si, pero nan ta limita. Tin anjanan cu WGK ta mustrando esaki na e diferente gobiernonan, y cu ta necesario pa nan duna servicio atardi y anochi pa duna un cuido continuo. Goeloe a splica cu tin hendenan inscribi na WGK cu ora nan drenta hospital ora nan sali bay cas, nan ta spera sigui haya e trato cu nan tabata tin, pero e riesgo ta cu otro pacient di esnan cu ta riba lista di spera por haya e lugar, y e famianan ta rabia y bin zundra na WGK specialmente e como director. Esaki ta un asunto cu ta bay wordo trata den un reunion cu WGK a pidi cu Minister Visser y AZV, pa aproba e ampliacion di personal pa WGK. |
Mustra/Kita e formulario di comentario
