| Frente Obrero kier laga pasado den pasado y bringa pa union, trankilidad, bienestar y independencia! |
 |
 |
| Sunday, 05 August 2012 20:14 |
|
Anthony Godett ta haya cu e mancha scur cu tin riba gobernacion den Reino, a wordo crea pa e antagonismo propaga pa un exponente di un of mas partido politico, mientras cu e islanan di Reino cada un, mester tin trankilidad y bienestar social, economico, educativo, financiero, etc., pa nan pueblonan. Frente Obrero ta papia di union, con pa yega na trankilidad y bienestar den cada cas na Curacao. E ta kere cu ofensanan cu a tuma lugar den pasado entre e diferente partidonan politico, mester keda atras pan nan por traha hunto, pasobra e pueblo sigur no ta interesa den redo, ni critica infunda, pero nan kier bay dilanti y progresa. Nan kier mira un balor agrega di e reunionnan cu lo tuma lugar pa formacion di un otro gobierno. Antagonismo no ta yuda e economia crece pasobra e inversionistanan cu ta bin establece den e pais ta busca un otro lugar pa bay, caminda no tin un clima di antagonismo, y no mester lubida cu Curacao no ta so den mundo, pero tin hopi pais den e mundo aki. Otro punto cu Anthony Godett ta bay hiba na Parlamento ta pa habri e posibilidad pa e yiunan di Curacao y Arubianonan biba na Hulanda of otro pais por duna nan voto di confianza ora tin eleccion na Curacao of Aruba respectivamente. Esey ta sosode den mayoria pais di mundo cu e ciudadanonan biba pafo por vota pero esey no ta e caso na Curacao ni na Aruba, mientras nan si por vota ora tin eleccion na Hulanda. E ta pensa cu lo no tin un miembro di Staten cu lo no sostene esaki. Anthony Godett ta sigui tambe e meta di Partido Frente Obrero desde su fundacion riba un dia 5 di Juli 1969 y cu tabata e deseonan di e pioneronan cu Papa Goddet, Amador Nita y Stanley Brown, y esey ta e independencia total di Curacao. Esaki mester tuma lugar den fase, prepara e pueblo mental y materialmente pa pone tur cos na ordo, cu e terenonan di educacion, e parti social, economia y finananza, etc., den un estado optimal no pa djis bisa “nos ta un pais ta independiente” y mira su bandera ta zwaai den Nacionnan Uni. Curacao no ta cla pa independencia pasobra e tin hopi pobreza den barionan, e economia ta stanca, e situacion financiero ta malo, y no manera gobierno anterior a priminti cu nan lo a cuminza un posicion financiero nobo pa crea un surplus te cu anja 2015, pasobra awor a bin tende cu tin un deficit di mas of menos 153 miyon florin. Nada no a cana e ruta cu e gobierno anterior a regla y awor mester stop di wak patras pero wak padilanti pa rescata e pais economicamente, financieramente, riba educacion y socialmente. Pa awor, Frente Obrero ta cla pa bay eleccion aunke e pais a wordo sorprendi cu disolucion di gobierno den oranan di madruga pa convoca eleccion nobo, cual fecha ta dia 2 di November venidero, Dia di tur difunto. Mientras tanto e pais ta sigui bay atras esun mas pober ta bira ainda mas pober y esnan cu tin manera ta biba den mas prosperidad, segun Godett. Partido Frente Obrero, como partido revolucionario semper ta pendiente pa cosnan tuma lugar na bienestar di e pueblo y semper cla pa yuda e digno pueblo di Curacao, independiente si tin of no eleccion. |
Mustra/Kita e formulario di comentario
