Danki na sosten di Digicel Special Olympics Aruba ta bolbe carga cu medaya di Surnam

Tuesday, 07 August 2012 14:23

Durante fin di siman pasa, e seis atletanan di Aruba cu a competi na e "National Games" di Surnam na Paramaribo a demostra nan forsa y ta gosando di e frutanan di tur nan esfuersonan di entrenamento di henter aña. E atletanan special a sa di representa nos isla na un tremendo forma y ta regresa cu un cantidad di medaya.

"Nos ta hopi orguyoso di nos hobennan," Tuyo Werleman di Fundacion Special Olympics a expresa. "Cu Digicel como nos sponsor, nos a logra bay Surnam unda cu nos seis atletanan a duna tur cu tin y a resulta medayista. Andre, Jeremiah, Anousha, Francis, Esmeralda y Diana ta bolbe Aruba hopi satisfecho di a conkista medaya den bolas criollas y diferente disciplina di atletiek," Sr. Werleman a añadi.E competencia na Surnam tabata basta pisa y a bay den un ambiente excelente. Nos atletanan a duna tur locual ta na nan alcance y awe nan coleganan di Special Olympics, como tambe Digicel y e comunidad di Aruba ta celebra nan medayanan hunto cu nan.Den atletiek Andre Geerman a gana medaya di oro den coremento 50m y plata den "kogelstoten" y Jeremiah Ellis a gana brons den coremento 50m y e di 5 luga den "softball throw". Pa loke ta trata bolas crioyas, Aruba a wordo representa pa dos duo hopi dinamico. Anousha Isei y Francis Croes a gana e medaya di brons den e competencia di "doubles" y Esmeralda Yarzagaray y Diana Mariana a duna nan contrincante di Surnam hopi dolor di cabes. Esmeralda y Diana a keda na di dos luga na final debi cu e wega tabatin "time-limit" y asina a gana e medaya di plata."Masha, masha pabien na tur nos atletanan special.

Nos ta hopi gradici cu Digicel como nos sponsor principal a haci e biahe aki posibel cu hopi entusiasmo y asina haci posibel pa nos team a triunfa un biaha mas den exterior tambe. Tur atleta di Special Olympics Aruba ta di fiesta y ta hopi motiva pa sigui train y competi contra otro como tambe den exterior contra otro atleta," Tuyo Werleman a conclui bisando.E atletanan tambe kier bisa "masha danki" na nan coachnan y acompañantenan pa e tremendo apoyo cu nan a ricibi durante nan biahe y particularmente a expresa cu nan ta sumamente contento cu tin dos mayor cu a biaha cu nan y brinda nan sosten hopi valioso. E relacion entre Digicel Aruba y Special Olympics ta existi desde aña 2003, hasta prome cu e compania a lansa su servicionan oficialmente riba nos isla. Desde e tempo ey, e compania cu e red mas grandi, mas miho y mas lihe na Aruba ta sostene Special Olympics den nan actividadnan. E compania tin un di e atletanan special den servicio pa hopi aña caba, demostrando no solamente nan patrocinio na e organisacion, pero tambe nan compromiso serio pa cu nos hobennan special.