|
Minister Michelle Winklaar: Den un ambiente di trabao hopi positivo ta cumpliendo cu e servicio cu nos tin deber di duna pueblo |
 |
 |
|
Tuesday, 07 August 2012 15:23 |
|
Recientemente Minister di Asuntonan Economico, Asuntonan Social y Cultura, Sra. Michelle Hooyboer-Winklaar a bishita e team di Sociale Zaken manera el a compromete cu nan di lo haci por lo menos dos biaha pa aña.
Durante bishitanan asina aki, e mandatario ta probecha y intercambia di idea y maneho cu e empleadonan di diferente seccionnan tocante nan trabao.
Minister Michelle Hooyboer-Winklaar su bishita mas recien a coincidi cu trabaonan di verfmento cu ta tumando luga paden di e facilidadnan. "E edificio a haya un tremendo facelift. Mi a pasa den henter e edificio pa cuminda tur empleado y papia cu tur esunnan trahando den e diferente seccionnan tocante nan trabao," asina e Minister a comenta.
Sra. Hooyboer-Winklaar a splica cu pa basta aña e diferente seccionnan di Sociale Zaken tabatin un falta na personal y esaki tabata causa hopi stress na trabao. "Awo nos a logra di haya algun hende cu 'overplaatsing' y a tuma algun otro riba contract den e seccionnan importante pa asina alivia e stress y yuda crea un miho ambiente di trabao. Asina, pa medio di percura pa mehoracion di e situacion interno, Sociale Zaken ta dirigi awe como un team na cumpli cu e servicio cu nos tin deber na ofrece na nos comunidad," segun Minister Hooyboer-Winklaar a enfatisa.
E feedback cu e titular di asuntonan social a haya en general di e miembronan di e team di Sociale Zaken mes ta cu e trabaonan ta canando awo hopi mas lihe y e ambiente di trabao ta hopi positivo.
Minister Hooyboer-Winklaar a expresa di ta hopi satisfecho cu e cambionan cu a tuma luga den Sociale Zaken, ya cu tin un aire positivo den e departamento. E Minister ta sigui cu su compromiso cu e empleadonan pa tene e liñanan di comunicacion habri y a añadi cu e lo sigui dialoga cu nan tocante nan trabao y ideanan y sugerencianan con pa sigui mehora e servicio cu Sociale Zaken ta brinda den nos comunidad.
 |
Mustra/Kita e formulario di comentario
