Ora cu Minister di Husticia y Enseñansa, mr. drs. Arthur Dowers a bishita Colegio Cristo Rey na Brazil el a haya un scol cu un infrastructura sumamente deplorabel. E edificionan tabata den un condicion a-hygienico pa via di e presencia di un cantidad masha grandi di paloma, ademas e gymzaal, e daknan di asbest y e bentanan tabata den un condicion decai y sigur no apto pa ni e muchanan ni e adultonan cu ta traha na e scol.

Durante su bishita el a wordo bisa cu Colegio Cristo Rey ta un "scol lubida" y cu diferente politico a pasa wak, pero nunca nan a saca man pa yuda nan. Minister Dowers a remarca cu Cristo Rey ta un scol un poco particular, no mucho grandi y probablemente no mucho conoci, pero e tabatin mester hopi yudansa. Loke ta sigur si, ta cu e renobacion di e scol aki lo tin un impacto hopi grandi ariba e infrastructura di su bario y e districto di Brazil. "Esaki lo ta sigur un contribucion na e muchanan, pero tambe na e bario den su totalidad," Minister Dowers a enfatisa. Minister Dowers di biaha a dicidi cu mester busca un luga pa muda e scol mas pronto cu ta posibel. E mudamento a tuma luga tambe y scol tin basta tempo caba cu e ta ubica den e edificio unda antes tabatin e cas di hende grandi (SABA), na San Nicolas. E proceso a inicia pa prepara pa e renobacion di e scol por tuma luga pa medio di fondonan di FDA y despues cu el a tuma su tempo necesario, dialuna mainta e contacto a wordo firma pa un inversion di 1.4 miyon florin pa e renobacion di Colegio Cristo Rey na Brazil. E renobacion di e scol di seis klas mester wordo completa den 4 luna di tempo segun e contract y Minister Dowers a expresa cu e ta conta 100% cu cooperacion di e contratista pa esaki wordo realisa tambe. Minister Dowers a expresa cu e y su team ta sumamente entusiasma, mescos cu na start di tur proyecto asina, pasobra e ta nifica hopi bes un adelanto sumamente grandi pa loke ta concerni e calidad di infrastructura pa enseñansa. E mandatario a gradici tur esnan envolvi den y concerni cu e proyecto aki y particularmente FDA cu a pone e fondonan necesario disponibel pa e renobacion por wordo realisa. El a añadi cu mas y mas scol ta wordo renoba y drecha y e ta spera cu pronto tambe lo por yega na firma e contractnan pa e otro proyectonan cu ta pendiente, entre otro e scolnan basico Frere Bonifacius y Mon Plaisir. Minister Arthur Dowers a comenta cu pa hopi aña no tabatin suficiente inversion den infrastructura di nos scolnan, pero loke tambe ta hopi importante y necesario ta pa percura pa fondonan wordo inverti den e scolnan mes. Falta di inversion den nos scolnan ta traduci su mes den un deficiencia den inversionnan den e futuro di un pais y e calidad di bida di e comunidad, cual ta crea den cierto sentido problemanan pa futuro. E falta di educacion, guia y siñansa di norma y balornan ora cu e persona ta hoben ta crea problemanan pa futuro. Minister Dowers ta di opinion cu tur hende hunto tin cu bay carga e responsabilidad pa esaki den nos sociedad pa evita problemanan mas grandi. Desaroyo economico y social di e comunidad no por sigui sin desaroyo den enseñansa, e titular di husticia y enseñansa a añadi. Minister Dowers a conclui bisando, cu aunke oposicion kier critica, no tin ningun proyecto cu a wordo haci sin cu a cumpli cu e rekisitonan di "comptabiliteitsverordening". "Nos ta sigui pasobra nos tin bienestar di e muchanan y nos comunidad na pecho!" Minister Arthur Dowers a enfatisa.

Comentarionan (0)

Mustra/Kita comentarionan

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi