Toyota a recupera di e 'safety recalls' y desasternan natural, bendiendo 4.97 miyon vehiculo rond mundo den e prome mita di aña pa recupera asina su corona como e fabricante di auto number un. E compania Hapones a bende rond di 300 mil auto y truck mas cu GM a bende den e prome mita di aña, un bentaha suficiente grandi cu lo ta dificil pa GM alcansa Toyota den e ultimo seis luna di 2012.

GM a bisa cu nan a bende 4.67 miyon vehiculo durante e prome mita. Ambos compania a anuncia nan cifranan diaranson ultimo. Pa Toyota Motor Corp., e cifranan ta acentua un regreso grandi for di un periodo di bentanan decepcionante, y e resistencia di e marca na mesun momento cu ta gana tereno den mercadonan nobo manera China y sur di Asia, mientras cu ta recupera e mercado cu el a perde na Merca. Ambos compania a bisa den pasado cu nan no ta tene cuenta cu e liderazgo den benta global y ta enfoca riba haci ganashi. Pero e corona ta un asunto di orguyo corporativo pa ambos fabricante di auto. Toyota su produccion a keda afecta dor di e teremoto y tsunami na noroeste di Hapon aña pasa y despues dor di inundacion na Tailandia, un base importante di produccion pa e fabricante. Prome cu e desasternan ey, su bentanan a baha dor di 'safety recalls' masivo na Merca, sumando mas di 14 miyon auto desde cu e problemanan den control di cualidad a bin dilanti tres aña pasa. Pero e produccion y benta di e compania a recupera mas lihe di loke a spera, haciendo e hopi dificil pa GM por a alcansa Toyota entre awo y fin di aña, asina Jeff Schuster, vice president senior di prediccion na LMC Automotive consulting firm na Troy, Michigan. GM ya caba tabata pega tras di Toyota pa e prome trimester di e aña aki cu 2.28 miyon auto y truck rond mundo, mientras cu Toyota a bende 2.49 miyon vehiculo. Toyota a pronostica cu lo bende 9.58 auto den 2012, 21% mas cu aña pasa. GM no a duna su pronostico pa henter aña. Chizuko Satsukawa, analista di industria di auto pa Standard & Poor's na Tokyo, a bisa cu Toyota ta confronta competencia pisa no solamente for di GM y Volkswagen, pero tambe di otro fabricantenan di auto, incluyendo Hyundai. Toyota ta contando riba su proximo ola di expansion na sureste di Asia, sigui pa mercadonan cu crecemento halto manera China, India y Brasil, el a bisa. "Toyota su regreso ta impresionante," Satsukawa a bisa. "Pero loke ta mas importante ainda cu e cifranan, ta cu tin ganashi.” Haci bon na Norteamerica tambe tabata critico pasobra e mercado rico aki ta caminda fabricantenan di auto, incluyendo Toyota, por spera di haya un ganashi gordo. Vocero di Toyota, Joichi Tachikawa a subestima e cifranan anuncia diaranson ultimo. “Nos ta djis sigui purba di traha bon producto cu ta atractivo pa nos clientenan,” el a bisa.