Minister Visser tambe a forma parti di e famoso full moon MTB tour organisa pa Tribal Cycling Club

Wednesday, 08 August 2012 08:26

E deporte di ciclismo ta uno masha gusta entre nos hendenan y dia pa dia ta birando mas grandi, hasta como un actividad pa henter famia haci hunto.

Dia 3 di augustus ultimo tabatin e famoso Full Moon MTB Tour organisa pa Tribal Cycling Club y Minister di Salud y Deporte, dr. Richard Visser tambe tabata presente, como cu el a ricibi un invitacion y no a duda niun momento pa participa na dicho evento. Pa cuater aña caba Tribal Cycling Club a bin ta organisa e tremendo tournan aki un biaha pa luna durante e siman di luna yen.

Dos luna pasa ya Tribal Cycling Club a organisa uno, unda cu tabatin 51 participante y luna pasa ta’tin 75 participante. Pero e biaha aki Tribal Cycling Club a logra e record di 124 participante y a keda hopi contento di por mira nos Minister di deporte tambe activo. Prome cu a duna inico na e recorido, Tribal Cycling Club & Co. a entrega Minister Visser e uniform oficial di e careda internacional, organisa pa Tribal Cycling Club / Monster Energy. Un biaha mas nan lo score cu un tremendo Tribal Cycling Club & Co., cu lo tuma luga dia 25 di november 2012: Duo Xtreme MTB Aruba. No por laga afo cu nos parlamentario, sr. Juan Yrausquin tambe tabata t’ey un biaha mas, pa sigui apoya nos den nos deporte di mountain biking.

Nos Minister di salud y deporte ta apoya e iniciativa unico aki, ya cu e actividad aki ta pa motiva tur hende pa haci movecion hasta den e oranan di anochi, mirando cu varios di nos hendenan ta hopi druk cu trabou den e oranan di dia. E biaha aki tabata toca e parti panort di Aruba na Jaburibari Parke Curazon, unda e participantenan a yega na masa. E ruta tabata uno semi-facil, saliendo for di e parking lot di Parke Curazon na Jaburibari, direccion pa Calabas y despues sigui pa districto di Noord, tuma despues un single trail (Calabas trail) pa sali na costa, unda tabatin e prome stop, pa tur hende yega hunto y despues a sigui pa Kapel di Alto Vista pa un di dos stop, despues sigui pa Calabas bek y finalisa na e parkinglot di Parke Curazon Jaburibari.

Minister Visser ta invita henter pueblo di Aruba pa nan tambe join e siguiente Full Moon MTB Tour, cu lo tuma luga riba diabierna 31 di augustus 2012 y ta stimula tanto grandi como chikito pa probecha di e tremendo actividad fisico aki, ya cu hunto nos ta sigui traha riba un miho calidad di bida y alabes contribui na engrandecemento di e deporte di ciclismo riba nos isla.