|
Studiantenan druk cu procedura di registracion |
 |
 |
|
Wednesday, 08 August 2012 15:11 |
|
Prome cu e grupo nobo di studiante cu siman pasa a yega Hulanda cuminsa cu nan estudio, tin un cantidad di procedura formal cu mester tuma lugar.
Esun cu ta kere cu ta suficiente inscribi bo mes na Censo, ta hopi kiboca. Banda di esaki tambe tin un bishita obligatorio na IND, cu ta e instancia na Hulanda di Immigracion y Naturalisacion, compara cu DIMAS na Aruba. E instancia aki ta stipula si e persona cu ta nobo na Hulanda ta cumpli cu tur e rekisitonan pa admicion na Hulanda. “Durante e preparacion na Aruba a bisa e studiantenan cu Hulanda ta un pais estricto, unda ademas ta vigila hopi bon si tur hende ta atene nan mes na e reglanan. E bentaha di esaki ta cu tur cos ta cana bon organisa, sinembargo esun cu no tene su mes na e reglanan, tin un problema. "Esaki ta e motibo pakico nos ta guia e studiantenan na nan bishita na e instancianan aki, pero tambe pa siña nan con nan por yuda nan mes y instrui nan den nan cuidad di estudio,” segun Samuël Dumfries, hefe di Departamento di Enseñansa di Cas di Aruba. “Nos mentornan di antemano ta haci un afspraak cu e instancianan aki, manera IND, pa asina tur cos ta bon prepara na momento cu e studiantenan pasa eynan. Esaki ta evita perdemento di tempo.” Pa e mira cu su mesun wowo cu tur cos ta cana bon, sr. Dumfries, ayera a bai personalmente cu e studiantenan cu mester a registra na e oficina di IND na Amsterdam. “Mi ta contento di tende di e studiantenan cu nan ta satisfecho cu e guia ofreci. Nan ta sumamente positivo ariba nan mentor Lourdes Bramble. E mentornan y e Comicionnan di opvang (POC) tin un tarea hopi importante pa mustra - den un periodo cortico - e studiantenan nobo nan caminda den e cuidad di estudio, p.e. con e transporte publico ta funciona y unda bo por haci compras barata. Mas liher e studiantenan sinti nan mes na cas, mihor nan lo pone atencion ariba nan estudio,” segun sr. Dumfries.
 |
Mustra/Kita e formulario di comentario
