| Parlamentario mr. Xiomara Ruiz-Maduro:Nos Ministernan Visser y Sevinger ta keto riba e asunto di asbest na school |
 |
 |
| Wednesday, 08 August 2012 15:43 |
 Na luna di juni un biento fuerte a bula un parti di e dak di e gymzaal di e school Mon Plaisier y como cu e dak ta di asbest e salud di e alumnonan, maestronan y e bisiñanan di e school a wordo treci den peliger.
Nos Minister Dowers a asumi su responsabilidad y a manda drecha e dak aki. Pero tin hopi preocupacion y pregunta riba e peliger cu a presenta y tambe riba e manera cu Gobierno ta tratando cu e caso aki. Particularmente nos Ministernan Visser y Sevinger no ta mustra interes y ta keto keto riba e asunto di asbest na school siendo cu tin cosnan cu no a bay bon. Nos a compronde cu e school no a wordo sera na momento cu e dak a kibra y e alumnonan, maestronan y mayornan a wordo exponi na e peliger di asbest. E bisiñanan no a wordo avisa di biaha di e peliger cu a presenta na momento cu e dak a kibra y tampoco na momento cu e trabounan di reparacion tabata tumando lugar. E compania pa haci e meting di e aire pa mira si tin particula di asbest den e aire a wordo yama mucho laat y pesey no por a haci un meting optimal di e peliger cu a presenta. E area rond di e school tampoco a wordo sera pa evita peliger di contaminacion di esnan cu a pasa den e vecindario di e school. Tin indicacion tambe cu e compania cu a haci e trabou di reparacion no lo ta certifica pa traha cu asbest y pesey no lo a haci e trabounan cu e debido atencion pa e seguridad di e personal y e bisiñanan den e vecindario di e school. Asina nos por a compronde cu tabata tin personal ta bari e stof blanco di asbest sin ningun clase di proteccion y cu no lo tabata tin un unit pa descontamina e personal cu a traha cu e asbest. Mirando e peliger cu a presenta pa salud di e alumnonan, maestronan, mayornan y tambe e bisiñanan di e school Mon Plaisier, ta lamentabel pa mira cu ni nos Minister di Salubridad y ni nos Minister di Medio Ambiente a mustra interes pa e salud di tur esnan envolvi. E mandatarionan aki no a sali splica Pueblo kiko Gobierno a haci pa evita cu e salud di esnan envolvi ta wordo treci den mas peliger. E dos mandatarionan aki mester por mustra nos cu e compania cu a haci e reparacion tabata debidamente certifica pa traha cu asbest y cu durante e trabounan medidanan di seguridad a wordo teni na cuenta pa no contamina e bario. Tambe nan mester por indica si e articulonan di e gymzaal a wordo descontamina adecuadamente pa nan por ta save pa wordo usa pa e alumnonan di e school. E mandatarionan aki tambe mester por mustra Pueblo cu despues cu e trabounan di reparacion a finalisa, cu meting a wordo haci di e aire y e tera y cu tur cos ta save pa nos muchanan por cuminsa un aña escolar sin ningun peliger pa nan salud. Esaki ta e responsabilidad cu nos Ministernan Visser y Sevinger mester asumi. Pasobra e salud di nos muchanan ta mas importante cu cualkier bishita na Weganan Olimpico y mas importante cu cualkier capricho pa mira un tram core den Oranjestad. E ta conoci cu asbest ta un material cu ora e kibra, su particulanan por bay den nos pulmonan y por causa cancer. Pesey na momento cu un dak di asbest kibra, sea door di un biento fuerte of durante trabounan di reparacion, nos mester tene debido cuenta cu e peliger cu ta presenta pa nos salud. Nos ta spera cu nos Ministernan Visser y Sevinger realisa cuanto peliger e alumnonan, maestronan y e bisiñanan di e school a core y asumi nan responsabilidad pa demostra tur esnan envolvi y e Pueblo di Aruba, cu durante y despues di e trabounan di reparacion a tene debido cuenta cu e salud di tur esnan envolvi y cu e alummonan di Mon Plaisier por cuminsa school otro siman sin ningun peliger pa nan salud.
Comentarionan (11)Mustra/Kita comentarionan ...
Xiomara: bisa berdad di ki tempo e cos nan ta eynan y kiko bo gobierno cu e tempo ey a inta pa 8 aña a haci pa cu esaki? Nada toch boso nan semper a ignora e cos aki y awor cu tur instancia ta involvi y ta traha boso kier para na banda haci show di critica. Pakiko bo no por coi un telefon yama e instancia nan concerni y puntra prome cu bo bay haci payasada?
,
August 08, 2012
Duna Comentario y/of Comparti riba Social Medi |
Mustra/Kita e formulario di comentario
