| Parlamentario Lainda Westerhof cu Zumbathon pa un bon causa |
 |
 |
| Wednesday, 08 August 2012 15:54 |
 Dia 30 september for dia 10 or di mainta te cu 12 or di merdia na Centro Deportivo Playa lo tin un tremendo Zumbathon cu meta pa den un forma saludabel recauda fondo pa un bon causa. E biaha aki e fondonan recauda lo bay pa fundacion E Faro.
E dia aki lo tin como instructor; Dwayne, Rose-ann, Dennise, Rene Wild y Mission y instructor di Venezuela Roberto. Tambe lo parti varios premio pa e persona of grupo mas bunita bisti, e persona mas anima y energetico. Lo tin “gift certificate” di Diamonds International, Jolly Pirates, The Star Hair studio y dos ticket pa Corsou. Mester gradici tur e sponsornan y tambe Tiara Air pa kere den e actividad aki y hacie uno posibel. Pakiko a scoge fundacion E Faro? Parlamentario Lainda Westerhof como “roll model” y representante di pueblo ta di opinion cu tin cu duna ehempel di cuida pa otro y nos comunidad. Como representante di e generacion nobo, nos mester cuminsa mustra cu e enfermedad di HIV por wordo preveni y combati. E malesa por ta incurabdel pero e no ta un sentencia di morto. Internacionalmente figuranan grandi ta sali publicamente pa cu e tema aki. Ta hasta bay asina leu pa sostene esfuerzonan pa combati e enfermedad. Parlamentario Westerhof no ta compronde dicon aki na Aruba e topico mester ta un tabu. E enfermedad di HIV por toca un amistad o famia y no mester ta un tema cu ta toca solamente na un fecha specifico o durante un actividad. “No solamente nos mester combati e enfermedad sino tambe e stigma cu tin pa cu e enfermedad di HIV. Bisa NO na descriminacion riba tereno laboral, social y medico.” Parlamentario Westerhof a declara. Mester por debati riba e tema aki publicamente den nos comunidad cu meta pa concientisa un y tur specialmente nos hubentud. Riba e pensamentonan aki Lainda Westerhof ta warda un y tur pa bin apoya riba 30 di september na e tremendo Zumbathon aki. Caarchinan ta disponibel pa solamente 10 Florin serca Rene Wild, Ryan Maduro, Lainda Westerhof (telefon 593-4659), voluntarionan di E Faro, Team Lai y na The Stars Hair Studio.
Comentarionan (2)Mustra/Kita comentarionan Duna Comentario y/of Comparti riba Social Medi |
Mustra/Kita e formulario di comentario
