| Prome Minister mr. Mike Eman ta felicita Jamaica cu 50 aña di independencia: Out of many, one people |
 |
 |
| Wednesday, 08 August 2012 19:13 |
|
Den nomber di pueblo di Aruba, Prome Minister Mike Eman, ta manda palabranan di felicitacion na henter e colonia Jamaquino na Aruba y pueblo di Jamaica en general cu e celebracion di 50 aña di independencia di nan pais. Dia 6 di augustus 1962 Jamaica a bira independiente di Inglatera. E aña aki ta marca 50 aña cu Jamaica a adopta un constitucion nobo cu no solamente a reconoce e diferente nacionnan di tur caminda di mundo cu ta forma manera nan ta yam’e “One People”, sino tambe nan potencial como lider pa guia nan pais. Mescos cu e Arubiano a lucha pa sali for di constelacion Antiyano for di añanan 40, a tuma e gran nacion di Jamaica mas cu 100 aña pa recobra derecho di voto, loke nan a logra na 1944. E grito pa un gobierno autonomo a resona riba e isla ora na 1962 a baha e bandera Ingles pa ultimo bes y remplas’e cu e bandera color di oro, preto y berde cu awe ta bula firme riba e isla. “Jamaica tin motibo pa dobel celebracion, ya cu yiunan di tera, entre otro Usain Bolt, Shelly-Ann Fraser-Pryce y Yohan Blake, a gana oro y plata pa nan pais na e Olimpiada na Londres. Pabien Jamaica, cu boso dobel logro e aña aki. Boso tin hopi pa ta orguyoso di dje,” asina Prome Minister mr. Mike Eman a bisa. |
Mustra/Kita e formulario di comentario
