Ing. Leo Boekhoudt: “Hunto nos ta yega na algo,” Tin espacio pa baha tarifa pero e discusion ta con

Thursday, 09 August 2012 22:49

Tanto ELMAR como WEB durante e tres dianan di Dialogo Social riba tarifa di awa y coriente a presenta cu nan tecniconan pa amplia mas ora cu esaki ta necesario. Un di e tecniconan presente di ELMAR tabata ing. Leo Boekhoudt, kende a splica cu e presencia di WEB y ELMAR den e reunion tabata pa amplia riba e structura nobo cu nan kier introduci.

WEB a splica con nan ta yega na e prijs di coriente cu nan ta bende ELMAR. Despues di esaki ELMAR por calcula e diferente prijsnan cu por bini cune pa yega na e diferente gruponan di tarifa: domestico, commercial, no-comercial cu ta conta e.o. pa misanan. Segun el a splica, e tarifanan cu tin ta data for di cuminsamento di ELMAR na inicio di añanan 1950, tempo cu Aruba practicamente no tabata tin coriente mes. Aruba en general tabata tin coriente entre 1960 y 1963, cual tabata un tempo completamente otro. Un tempo caminda cu tabata stimula e hendenan pa uza coriente, cumprando aparatonan electrico. Aworaki e tabata asina cu mas uza, mas ta subi e tarifa pa evita cu e hendenan ta gasta mucho coriente. E calculacion husto, segun ing. Boekhoudt no ta algo facil pasobra mester tene cuenta cu e diferente gruponan. Cada grupo ta mira nan interesnan, manera hotelnan cu mester tene cu nan tarifa di cambernan, pero di otro banda mester tene cuenta cu e consumidornan domestico cu tin su limitacionnan. E ta bisa cu un negoshi por ehempel, por hinca e gastonan di utilidad den nan prijsnan, pero na un cas ta esnan cu ta biba eyden so tin pa pague. Si kier yuda pueblo, e ta kere cu lo mester concentra riba tarifa domestico prome. ELMAR y WEB a reuni pa yega na structuranan nobo, caminda ta wak cual ta e necesidadnan den e compania pa keda opera den un forma sano, cu bon calidad di coriente sin perhudica e economia di Aruba. Loke cu resto ta bay pa pueblo y awor ta asina cu tin espacio pa baha tarifa, pero mester sinta discuti hunto pa wak cu e reparticion ta bay na e mihor manera. No ta keda ni na ELMAR y WEB pa dicidi esey riba nan mes. “Hunto nos ta yega na algo,” Boekhoudt a bisa. Di otro el a bisa cu e cambio ta uno grandi y cu lo no ta facil pa e ciudadano. E motibo ta cu esnan cu tabata uza hopi mester tene cuenta cu si nan sigui uza hopi nan ta bay paga un averahe hopi mas halto cu lo dal nan mas duro. E ta tarea di ELMAR ta pa conscientisa e ciudadanonan pa baha man unda cu por pasobra consumo di coriente ta necesario pero tin hopi hende ta mal uza coriente. Si nan baha nan consumo nan lo no cay den e braket caro y cay den esun mas barata cu ta esun bou di mil. E proposicion cu a wordo haci door di ELMAR ta consisti di tres grupo: te cu 500 kwu; te 1000 kwu y e di tres ta riba 1000 kwu. E ultimo aki lo ta esun cu e tarifa mas halto. Boekhoudt a enfatisa cu no mester lubida cu Aruba ainda ta depende di fuel pa crea awa y coriente, pero WEB ta buscando manera pa independisa su mes di e fuel. Si e fuel subi, apesar cu e eficiencia a drecha grandemente, no por bisa con e prijs lo ta a lo largo. E ta dificil pa bisa cuanto e lo baha y pa cuanto tempo e lo dura. E reparticion ta depende di e Dialogo. E ta kere cu e plataforma aki ta un bon manera pa yega na proposicionnan cu tin un sosten mas amplio. Aunke e ta enfatisa cu nunca lo por complace tur hende y hendenan cu tin nan problema specifico por aserca e compania. Pero no por bay soluciona esaki cu e tarifa pa nan den casonan individual. Por ehempel, e ta menciona problemanan social. Pa finalisa el a splica cu e promocion pa no uza mucho coriente, ta duna ELMAR e espacio pa por traha. Mucho uzo ta nifica cu WEB mester engrandece su capacidad pa solamente acomoda esnan cu ta gasta coriente pa loco, no eficiente. E idea ta pa cambia e structura di tarifa cu tambe ta un manera pa protege e compania su posicion, door di baha di e volume.