Cabesante di Frére Bonifacius entusiasma cu paso nobo den aña escolar 2012/2013

Thursday, 09 August 2012 22:56

Docentenan tabata den un scol basta decai y te hasta nan a protesta. Cabesante di Colegio Frére Bonifacius, Sra. Arline Kock, a comenta cu ayera a wordo notifica cu e muchanan di scol lo bay Burubundu, pa asina cuminsa nan lesnan. Awor tin cu warda wak kico lo bay haci cu e scol.

Awor aki Sra. Kock tin 10 aña como cabesante y 25 aña trahando na Colegio Frére Bonifacius. E noticia tabata hopi bon pasobra e docentenan ta hopi preocupa cu e situacion di e edificio. Cada biaha e ta bira mas pio. E ta sak, murayanan ta cay y ta sumamente peligroso. A cuminsa cu un trayectoria di pidi un solucion pa e edificio. E docentenan a drecha varios biaha, pero door cu e ta keda sak y scheur, a lo largo mester sali pa asina por mira kico ta pasando den e suela pa mira si e por drecha e edificio. A manda varios carta di tempo di Minister Frido Croes. Por imagina con hopi tempo tin caba ta bisando cu mester haci algo cu e edificio. E docentenan ta sumamente contento, aunke cu esaki ta encera hopi trabao, pero esey no ta problema. No tin miedo di traha. Loke pa e docentenan ta importante pa sali for di un edificio cu ya no ta sigur mas pa e muchanan y esey ta algo cu ta pisa masha hopi mes. Pa e scol, a cuminsa paketa caba. Door cu tin hopi mucha cu ta bin di diferente districto, lo bay bira bus. Mayornan lo mester wordo avisa cu prome cu 7:30 di mainta pa bus busca e muchanan. Mester sinta cu Directie Onderwijs pa asina mira con por regla esaki. Sra. Kock ta pidi mayornan di biaha pa asina nan ta pendiente di television, radio, corant, pasobra lo bay tin avisonan cu lo mustra e siguiente pasonan pa yega na Burubundu. Tin un afspraak cu cabesante di St. Dominicus, caminda cu e lo bay wordo informa con por wordo haci. E scol a pasa door di hopi cos prome cu nan a drenta den e edificio nobo. Ya caba nan sa caba con e wega ta y lo ta mas facil pa pone e cabesante di Frére Bonifacius na altura y yud'e cu reglanan cu nan tin caba y asina ey conhuntamente den cooperacion por mira con por vang op e situacion mas miho posibel. Frére Bonifacius tin por lo menos 200 alumno. No tin nada fiho cuanto tempo lo dura riba renobacion di scol. Minister Dowers tin cu sinta cu directiva di SKOA pa mira kico lo bay haci cu e edificio. Deseo semper tin un monton. Deseo di e cabesante ta pa tin un scol nobo cu tur cos riba dje cu e muchanan tin mester pa asina e docentenan brinda e miho servicio posibel. Ta algo importante di educacion. Na e scol tin falta di local. Si e docentenan ta hopi creativo pa duna e servicio cu cada alumno tin mester. Cada mucha un biaha mas ta rekeri algo special y algo special kiermen cu mester tin hende special. Mester tin un luga special pa atende e muchanan. Si haya un scol nobo cu tin tur cos cu mester tin pa duna e bon servicio na e alumnonan, e lo yuda masha hopi mes den educacion di e muchanan. Ampliacion semper por. Por bay hasta den halto. Esey Sra. Kock kiermen no ta tanto problema. Pero esaki ta decision di Minister conhuntamente cu SKOA pa mira kico lo haci cu e edificio. Drecha e mester ta, of lo tin cu traha un nobo. Recientemente a yama un reunion di emergencia caminda e docentenan a bin di biaha cu hopi entusiasmo. Ta hopi trabao si, pero alabes ta bay un luga cu ta sigur pa e muchanan y tambe pa e docentenan tambe. E docentenan den su mayoria t’ey y a cuminsa hinca cos den caha pa move mas lihe posibel.