| Den Dialogo Social: FTA masha contento di a wordo consulta riba reduccion tarifa awa y coriente |
 |
 |
| Thursday, 09 August 2012 23:10 |
|
Pa Federacion di Trahadonan di Aruba, FTA, e plataforma di Dialogo Social a haya un bon forma pa discuti e rebaho di tarifa di awa y coriente. Hubert Dirksz, representando e sindicato den e Dialogo Social, a bisa cu Gobierno en realidad lo por a tuma un decision riba su mes pa loke ta reduccion di tarifa di awa y coriente. Pero ta contento cu a permiti Gremionan por medio di Dialogo Social duna nan opinion riba e restructuracion di e tarifanan. Por ta sigur, el a bisa, cu ta bin un reduccion di tarifa di awa y coriente. Y den e Dialogo Social ta trata cu esaki ta wordo implementa di e forma mas husto posibel, caminda esnan di mas necesidad lo por haya un “break” , hayando un reduccion den e tarifa di awa y coriente. Importante den e cambio aki ta cu mester corda cu tanto WEB como ELMAR tin su gastonan pa cual nan mester sigui haya entradanan. E entrada ey, Gremionan ta kere, basa riba e consumo cu ta tuma lugar, e comunidad mester haya un break. Ta studiando te con leu e sector commercial por carga un tiki mas, aunke cu nan tambe lo haya e reduccion. Den e Dialogo Social, WEB a bin cu un structura di tarifa mientras cu Gobierno tambe tin un formula pa introduci e reduccion aki pa e clientenan. E formula di Gobierno no ta malo, pero nan di FTA lo kier haya mas comentario di WEB y ELMAR riba esaki y otro preguntanan cu FTA tin. Gremionan kier un WEB y ELMAR duradero cu por carga e tarifanan aki, cu lo ta pa termino largo. FTA a duna su contribucion, aunke cu e ta basta tecnico. Na final kier mira con e tarifa lo bay ta. Awor ta keda na gremio syndical y commercial bini cu nan proposicion pa e reduccion di tarifa of comentario di loke WEB / ELMAR y Gobierno a presenta. |
Mustra/Kita e formulario di comentario
