| Skateboarding y shopping den Caya Betico Croes |
 |
 |
| Friday, 10 August 2012 20:03 | |||||||||||||||||||||||||||||||||||||||||||||
|
Minister di Salubridad y Deporte, dr. Richard Visser den su afan pa desaroya y diversifica deporte na Aruba, riba diabierna y diasabra ta presenta un evento espectacular di skateboarding den Caya Betico Croes. Diasabra durante dia lo tuma luga e evento di demostracion y competencia di e deporte extremo aki, cu presencia di streanan internacional di skateboarding, J.B. Gillet di Francia y Pete Eldridge di Los Angeles, California. Nan ta na Aruba riba invitacion di Minister Visser y como tal a pasa bishita e mandatario pa combersa riba plannan pa cu e deporte di skateboarding na Aruba. E idea pa trece J.B. y Pete Aruba a surgi durante un bishita di Minister Visser canando den Caya Betico Croes. Ey el a topa cu algun skateboarders cu a organisa nan mes y tabata bendiendo rifa pa recauda fondo pa un skatepark. E soño di e skaternan tabata pa establece un parke cu tur tipo di rampa cu ta apto pa nan practica e deporte extremo aki, pero tambe pa organisa competencia. Minister Dr. Richard Visser a papia cu e hobennan y aki a nace e plan pa organisa un actividad special pa motiva y sostene amantenan di skateboarding. E mandatario ta conoci como un persona cu ta gusta deporte extremo y como un skater a mustra hopi interes den e vision di e hobennan pa cu e parke aki. Skateboarding a conoce bon crecemento na Aruba y ta merece mas atencion. Particularmente entre hobennan masculino e deporte ta popular, pero ta nota cu poco poco mas mucha muhe tambe ta durf di participa. Skateboarding ta desaroya agilidad motorico y agilidad mental, como tambe e habilidad pa crea solucion y traduci esaki den movecion den fraccionnan di seconde. E ta un deporte cu ta rekeri curashi, pero ta yuda tambe desaroya curashi, talento y creatividad.
|
Mustra/Kita e formulario di comentario
