| Segun Anselmo Pontilius, Intermediacion mediador ta necesario den hopi caso di conflicto laboral |
 |
 |
| Friday, 10 August 2012 21:39 |
|
E dirigentenan na mesa tin biaha no ta soporta otro, envez di concentra na hiba e discusion mas lihe y mas habri cu e por ta, pa rapido por trece trankilidad y esaki mester ta parti di e tarea di cualkier mediacion cu por tin. El a bisa cu na final di cualkier mediacion mester convence e partidonan pa respeta opinion di otro y cu cada partido tin derecho di tin nan propio opinion y cu tur dos partido por sali gana for di e resultadonan. Mas cu tur cos e partidonan mester realiza cu no ta solamente ken ta sali gana awor, pero con ta keda convivi y traha cu otro pa futuro. Ideal ta pa e dos partidonan convence otro di lokenan tin riba mesa, pero tambe ta asina cu tin biaha nan ta prefera pa tin un tercer partido cu por trece algo nobo, no necesariamente ta satisface tur dos partido, pero e momento ey e ta caminda meymey pa nan por yega na otro. Compara cu e resto di nos region, segun Pontilius, na Aruba tin mas dialogo ta tumando lugar mas cu 10 of 15 anja pasa, y ta realiza finalmente cu dialogo ta e caminda, loke no ta kita afo cu por tin confrontacion cu ta e derechonan cu e partidonan tin, pero ta evidente cu tin mas den e direccion ey. Oficina di mediador hunto cu departamento di labor lo trata di contribui riba programanan di formacion y informacion e anjanan cu ta sigui tanto dirigi na e sindicatonan como na e dunadornan di trabao caminda un di e metanan ta pa mantene e paz laboral. Pontilius a bisa tambe cu tin varios cambio ta bin den e ley laboral y minister ta para tras di esakinan y nan lo trece alivio y mas paz y trankilidad laboral. E cambionan aki ta riba mesa, y e meta ta pa evita pa situacionnan laboral bay den extremo. |
Mustra/Kita e formulario di comentario
