| Ku hopi atenshon Frakshon di PAR a bin ta sigui e desaroyonan na Kas di Kultura |
 |
 |
| Friday, 10 August 2012 23:15 |
|
E novela na Kas di Kultura ta kontinuá kada biaha ku un kapítulo aserka miéntras ku maneho di kultura di nos pais a deteriorá. Tur loke ku Gobièrnu di signatura di PAR a traha duru pe ta keda trapa pa e Gobièrnu aktual. Danki na vishon di sra. Emily de Jongh Elhage, ku a nombra sr. Rosalia pa traha un plan di maneho pa kultura, despues sòru pa reorganisá e tempu ei Servisio di Kultura i mas despues lanta e aktual Kas di Kultura ku a ehekutá di forma eksitoso e plan di maneho pa mas ku 5 aña. Awe nos ta tuma nota ku no tin maneho di kultura, no tin plaka pa kultura. Loke si tin ta kultura di miedu, kultura di konflikto i kultura di intimidashon.E situashon finansiero di Kas di Kultura ta kritiko! Kasi por denominá Kas di Kultura komo fayit. No tin sèn pa nada! Mas ku awe nos por a komprendé ku un di e selebrashonnan di mas importante den nos pais no ta haña e fondo usual serka e Gobièrnu aki. Un Gobièrnu ku ta preferá di paga mas ku fl. 50.000,- florin pa luna pa sera e karetera na Nieuwe Haven enbes di pone prioridat i pone e sèn aki disponibel pa entre otro e selebrashon di persona ku gobièrnu di PAR a denominá komo un di nos héroenan nashonal, Tula. Un Situashon inkreibel i nunka bisto. Pió ainda un situashon krea pa e Gobièrnu ku semper a pretendé di tin e lucha di Tula haltu den su bandera Relashoná ku e situashon aki Frakshon di PAR ta aserka Minister ku e siguiente preguntanan;Te ku awe Parlamentu no a risibí e rapòrt di investigashon ku a keda traha i ku awe Gobièrnu ta usa komo base pa trese e káos ku tin aktualmente den Kas di Kultura. Parlamentu por risibí e rapòrt aki i tur otro rapòrt ku a traha riba e situashon na Kas di Kultura, promé ku 10-10-10 i despues di 10-10-10. Parlamentu por risibí e relatonan anual di 2010 i 2011 di Kas di Kultura? Parlamentu por haña un bista por eskrito di e situashon finansiero di Kas di Kultura? Parlamentu por haña informashon dje motibu ku e Plataforma Selebrashon Konsenshi Históriko e aña aki no ta risibí e sèn manera nan a kustumá di risibí esaki? Frakshon di PAR ta spera ku mas pronto ku ta posibel, en todo kaso promé ku e selebrashon di 17 di ougùstùs e ta risibí kontesta di Minister. |
Mustra/Kita e formulario di comentario
