| Celebracion sensacional di "Dia di Boneiro" na Aruba |
 |
 |
| Saturday, 11 August 2012 10:48 | ||||||
|
Pa conmemora e dia aki, e comision ta organisando un siman completo di actividad cu lo culmina riba diadomingo 9 di september den Club Boneriano. E idea ta pa atrae Bonerianonan pa bin Aruba, igualmente tambe Bonerianonan biba na Corsou. Hunto cu e historiado, periodista y escritor Boy Antoin, e gruponan musical Foyan Boys, Tutti Frutti y Grupo Eso di Boneiro tambe lo ta na Aruba. Nan lo haci diferente presentacion na Aruba. For di Corsou e conocido Grupo Kompèr lo celebra e fecha aki na Aruba hunto cu nan rumannan Rincon Boyz. Como cu esaki ta encera mas cu musica tipico, e comision a dicidi di agrega Claudius y su grupo OREO, Tsunami y Le Groove di Aruba. E conocido Jairo Evertsz, ta presidi e comision hunto cu demas miembronan Ruben Garcia, Munje Winklaar, Magda Nicolaas y Elvis Tjin Asjoe. Nan hunto ta organisa un gran celebracion di canto, baile, cuminda y e tradicional wapamento di simadan den cayanan di San Nicolaas. Tiara Air, Romar Trading, Holiday Inn, Eden Beach Resort Bonaire y diferente otro instancia y comerciante ya ta brindando nan cooperacion, cu ta haci cu riba diabierna 10 di augustus un delegacion a sali pa Corsou parti mainta y Boneiro den oranan di atardi, pa presenta esaki durante un conferencia di prensa. Bonerianonan residencia na Aruba a sigura cu e evento aki ta hopi peculiar, pasobra ora bo ta for di bo tera natal, un dia nacional ta conta dobel den bo sentimentonan patriotico. Ta cu esaki den mente, ta invita un y tur pa bin celebra dia di nacional di Boneiro durante henter un siman na Aruba, esta di dia 3 pa 9 di september. Durante e siman di preparacion pa ‘Dia di Boneiro’ na Aruba lo pone atencion na e cultura Boneriano pa medio di diferente charla y entrevistanan na radio y television bou encargo di Boy Antoin.
Comentarionan (3)Mustra/Kita comentarionan ...
Dushi nos ta hasi. Union ta hasi forsa. Semper e simadan den Bonaire club tabata jen di ambiente y bon cushina , masha dushi mes. Mi cutura, bo c*ltura, Nos c*ltura . Nos lo tey manera bolo preto na bruid...
,
August 11, 2012
...
Si hiba tur e grupo nan musical di Bonaire bai toka na Aruba riba dia di Bonaire anto ta kwa ta keda toka aki na Bonaire mes. Dia 6 september e banda nan musikal ei mester toka aki na Bonaire, ta aki ta kaminda di selebra dia di Bonaire. Boneriano nan afo di Bonaire mester bini Bonaire i bin engrandese e selebrashon aki na bonaire. Nos mester invita hendenan di Aruba i korsou pa bini Bonaire bin selebra riba 6 september.
,
August 11, 2012
...
@ mr. Nilo, Mi ta kere cu e bandanan di Bonaire, lo ta na Aruba pa weekend , no tur hunto y no dia 6 mes cu ta dia di Bonaire. Check cu e commishon pa palabra hunto, si bo tin problema cu esey. No ban crea un issue un problema cu lo cual mester ta celebrashon, alegria y union. E intenshon ta bon su tras.
,
August 12, 2012
Duna Comentario y/of Comparti riba Social Medi |
Mustra/Kita e formulario di comentario
