| Red Machine victorioso un bez mas riba O’stad Stallions den Baseball AA |
 |
 |
| Saturday, 11 August 2012 19:50 |
|
E batenan di Red Machine tawata skerpi den e promer inning di e partido, pero pa mayoria por bisa cu bastante di e batazonan tawata den cercania di e defensa di Stallions, cu di nan banda no a keda sin haci e hugadanan basiconan aki pa asina mantene nan mes den e partido. Mas e inningnan a pasa, mas Red Machine a bin na hinca batazonan den area bashi di e veld y asina conduci na hugadanan pa score caredanan. Siguramente por a wak un Kenny Hart los no menos cu dos batazo di cuatro skina pa Red Machine y mas laat den e partido, su companjero di equipo Jair Thompson a dicidi cu e no lo bai cas e anochi aki sin cu e los un homerun di mes. En total, e offensiva di Red Machine ta logra score no menos cu 11 careda e anochi. Riba monticulo, Red Machine a start cu Jason Ile-Sam-Foek e anochi aki. Un hoben cu a bolbe bek Aruba recientemente cu tin hopi experienca hungando baseball na Europa. Sigur un braza hopi cu hopi potencial y cu bullpen sessionsnan adecuado den e siguiente dianan/simannan, nos lo por expect e hoben aki di por ta un posibel difference-maker mas den e playoffsnan venidero. Jason ta tira su promer inning e anochi aki sin mucho problema, pero no ta logra encontra e zona di strike consistente den e di 2 inning, ta laga un careda score y ta yena e basenan. Red Machine ta haci un cambio di pitcheo y ta trece Randy Croes pa asina suavisa cos. Den bom di inning number 6, Croes ta laga un slider colga riba e mei mei di plato, di cual e tercera base di Stallions, Levi Angela, ta conecta un homerun di 2 careda. En total Croes ta lanza 7 inning fuerte, unda cu Stallions ta score 4 careda, pero di cual 2 di nan ta caredanan sushi por medio di errornan di e defensa di Red Machine. Croes ta bai cas e anochi aki como e pitcher ganador. Luis Roman ta drenta den inning number 9 pa asina saca e ultimo 3 outnan e anochi aki pa Red Machine. Asina aki tambe, Red Machine ta gana e partido aki cu score di 11-5 y ta continua cu nan dominio den 2012 extendiendo nan record na 8 gana y 0 perdi. Siguientemente Red Machine lo ta un bez mas riba tereno Diabierna venidero (Aug 17, 2012) na Stadion na Santa Cruz pa exactamente 8or di anochi. E biaha aki e bataya lo ta contra Valero Brazil. Pues un bez mas fanaticada di bon baseball di Red Machine ta cordialmente invita pa asina aborda e trein corra den 2012…. Chuuuuu Chuuuuu |
Mustra/Kita e formulario di comentario
