Logronan impactante den 100 dia di gobernacion Gabinete Mike Eman: Parti 1

For di ora cu resultado di eleccion tabata conoci por a sinti e aire di speransa fresco cu tabata supla den tur skina di Aruba. Un speransa cu cos lo bay y lo wordo drecha, un speransa pa un miho mañan, un speransa nobo cu un gobierno nobo. E speransa cu tababa biba den curason di hopi a bira realidad dor di e logro y metanan cu e gobierno nobo lidera pa un Prome Minister cu un vision grandi a pone su dilanti pa e prome shen dianan di su gobernacion. Logro y compromisonan realisa cu entre otro e meta fiho pa combati e crisis financiero y pa trece positivismo bek na Aruba.

Rescate di nos edificio historico di gobernacion

E tabata algo simbolico. Mientras paden formador Mike Eman tabata reuni cu hefenan di tur departamento di gobierno, gremionan, instancianan, organisacionnan, fundacionnan y otronan pa forma un gobierno nobo, pafo e trabou pa restora e edifico decai di bestuurskantoor tabata bai a toda marcha. Mas di shen voluntario a yega eynan y a cuminsa traha incansablemente riba e edicifio monumental di gobierno cu a para bira un ruina den e ultimo añanan. E trabounan duro aki tabata pa e edificio historico aki keda cla na tempo pa e gobierno nobo por a sinta eyden manera cu semper tabata e caso. Pueblo a brasa e iniciativa di e gobierno nobo y di tur forma a duna un man. A bin cu cuminda y awa pa e voluntarion eynan, a trece material pa nan por a traha y comunidad a duna su sosten masal y tabata stimula e accion aki dor di pasa y bin eydilanti pa apoya e trahadornan. E prome logro visibel di e gobierno nobo tabata un echo. Dia cu Gabinete Mike Eman a huramenta, e fiesta pa pueblo tabata dilanti di un bestuurkantoor renoba, pero ainda no completamente cla. Awe tur Minister ta sinta hunto cu nan staf eyden y ta atende publico eyden. Loke ningun hende a kere posibel, a wordo realisa pa e gobierno aki cu ayudo incondicional di pueblo.

Mehoracion di relacion cu Reino

Dia cu Gabinete Mike Eman a huramenta, secretaria di Estado pa Asuntonan di Reino sra.Ank Bijleveld tabata presente, mescos tambe Prome Minister di Antiyas sra.Emily de Jongh-Elhage, dunando asina nan aprobacion na e gobierno nobo. Sra.Bijlveld den su discurso a demonstra sin ningun reserva su alegria cu e gobierno nobo. Despues di un periodo largo di discusion y disunion cu e gobierno anterior, Hulanda y Antiyas a sinti cu cosnan ta bai drecha pa miho. Na luna di december Prome Minister di Aruba Mike Eman a wordo invita dor di Prome Minister Hulandes Balkenende pa atende un reunion di Ministerraad di Hulanda pa eyden duna un presentacion di e plannan di su gobierno. Un unicum, ya cu nunca prome algo asina a yega di tuma lugar. E ultimo discurso na aeropuerto di Schiphol di Minister di Transporte Camiel Eurlings tabata otro muestra palpabel cu gobierno Hulandes tin gran aprecio y respet pa e gobierno nobo cu ta na mando. Minister Eurlings a bisa Prome Minister di Aruba Mike Eman cu Gobierno Hulandes ta contento cu e cambio di gobernacion, accentuando cu nos ta partnernan igual den Reino y cu e respet ta mutuo. Un logro cu sin duda lo trece beneficionan grandi pa henter Aruba. Un miho relacion cu Reino Hulandes ta na bentaha di cada un di nos riba e isla aki.

Revitalisacion di nos centro di cuidad y barionan

E trabou di restoracion di nos centro di cuidad y barionan a cuminsa caba. Un trabou inmenso cu ta encera entre otro embeyicimento di caya grandi, conservacion di e centro historico di Aruba, mudamento di e containerhaven, construccion di dos ringweg y un vierbaansweg, restoracion di e cas di Gobernador, di Lagoen, di e edificio di J.F.Kennedy school, di e watertoren na Playa y San Nicolas mescos tambe Joe Laveist Sportpark, ponemento di luz den diferente bario, mehoracion di e barionan dor di bin cu parkenan di actividad, ponemento den funcion un bes mas di e hulpbestuurskantoornan y otro servicionan di gobierno y hopi hopi mas. E plannan pa revitalisa nos centro di cuidad y barionan a wordo discuti y studia ya for di tempo cu e actual gobierno tabata den oposicion. Restoracion di bestuurskantoor tambe ta cai bou di e proyecto prestigioso aki. Dia 13 di januari e plannan ambicioso di gobierno pa revitalisa centro di cuidad, su becindario y barionan manera ta poni den su Plan di Gobernacion a wordo devela cu masha orguyo riba Plaza Daniel Leo. Un publico grandi a sera conoci cu e proyecto fantastico aki. Otro logro di e actual gobierno.
Pa por lesa parti 2 y 3 primi local y lo bo haya e dos articulonan den e categoria aki.