Parlamento unanimamente a sostene Gobierno pa habri Aruban Resort

Ayera den Parlamento tabatin un reuinion publico cu a dura bastante ora. E reunion aki a wordo pidi dor di Minister Otmar Oduber cu caracter di urgencia pa por logra habri The Aruban Resort mas pronto posibel. Click lesa mas pa mas info...

Despues di basta ora di intercambio di opinion por bisa cu e 21 parlamentarionan a bay di acuerdo pa duna Gobierno e sosten necesario y a acorda unanimemente un mocion presenta. E mocion ta bisa cu considerando e importancia di reapertura di operacion di The Aruban Resort pa empleo di tata y mama di famia aki na Aruba; cu reinstitucion di e trabou di tata y mamanan di famia aki ta primordial; e aporte substancial na nos economia cu operacion di The Aruban Resort ta encera; e riesgo cu e casi 4800 miembronan di timeshare ta core cu ciere continuo di operacion di The Aruban Resort; e importancia di e nomber di Aruba den mundo y pa futuro di e industria di turismo di nos pais; e carta fecha dia 4 di februari, 2010 di Minister di Turismo y Transporte pa Presidente di Parlamento tocante e tema aki ta dicidi lo siguiente.

“Pa bay di acuerdo cu Gobierno su empeño pa yega na un solucion satisfactorio pa e situacion di The Aruban Resort; pa urgi Gobierno pa percura pa e interes di e extrahadornan di The Aruban Resort keda salvaguardia; pa urgi Gobierno pa dentro di 60 dia bin cu un concepto di ley pa cumpli cu articulo 1 sub 4 di e concept ‘loan agreement’ entre The Aruban Resort Coop y Aruba Investment Bank N.V. y e concept “garantieovereenkomst” entre Aruba Investment Bank y Gobierno di Aruba”.

A pesar cu e reunion no a yega na su final ainda y ta continua awe tardi pa 5’or, toch tur fraccion den Parlamento a ratifica nan firma y nan sosten na e mocion aki pa di e forma aki e proceso pa reapertura di The Aruban Resort por sigui cana su caminda y mas pronto posibel e por bolbe ta den operacion.

Minister Otmar Oduber a keda sumamente satisfecho cu e resultado di e reunion publico aki caminda interes general y di e trahadornan a sa di prevalece y di e forma aki a gradici tur fraccion pa e sosten duna na Gobierno.