| Sint Maarten: Prizoneronan ta kita yabi for di bewakernan den Point Blanch |
 |
 |
| Saturday, 02 June 2012 15:57 |
|
E tension actualmente cu ta existiendo den Point Blanch Prison, Sint Maarten, a escala diasabra ora cu prizoneronan a logra haya yabinan for di bewakernan. Polis actualmente ta mobilisando den evento cu nan servicio ta wordo pidi na e instituto coreccional. Durante e añanan, mayoria parti, e atmosfera tabata keto, sinembargo durante e ultimo lunanan, cosnan a cambia drasticamente. Siman pasa, prizoneronan a bay den un “welga pacifico” cu a resulta den un completo “lock down” pa e prizoneronan. Ainda e lock down aki no a wordo reporta cu a wordo lanta. E fuente di e agitacion di e prizoneronan ta debi na e condicionnan cu ta existi na e institucion. Condicionnan caminda nan ta reclama cu no ta adecuado pa e prizoneronan y cu nan derechonan humano ta wordo abusa. Abogado Shaira Bommel, kende tin clientenan cu ta deteni na Point Blanch Prison, a bisa cu e siman aki, cu e tin preocupacionnan serio encuanto di e condicionnan cu tin tras di muraya di e prizon y cu el’a tuma pasonan legal cu e meta pa haya un solucion. Un di e kehonan mayor di e prizoneronan ta cu nan no ta haya nan cuminda na ora y cu e periodo entre e cumindanan por yega te na 36 ora. Reportenan ta cu nan a wordo gelock riba diabierna atardi solamente pa nan a haya the y pan mainta riba diasabra. Riba diaranson, Prome Minister Sarah Wescot-Williams a declara cu su gobierno tan a altura di e problema, indicando cu Minister di Husticia Roland Duncan ta tratando e asunto aki.
|
Mustra/Kita e formulario di comentario
