| Presidente di Carbon War Room: Kier hiba e acuerdo cu Aruba pa otro islanan tambe ehecute |
 |
 |
| Thursday, 21 June 2012 09:34 |
 Presidente di e organisacion Jose Maria Figueres, ex Presidente di Costa Rica, den entrevista duna a bisa cu e iniciativa lansa ayera di 2030, entre Gobierno di Aruba y Carbon War Room (CWR), tin un nificacion special. E ta un opcion y posibilidad real cu den transcurso di e proximo tempo lo traha hunto pa Aruba den futuro no depende mas di combustibel importa, cu e isla por crea su mesun combustibel basa riba energia renobabel. Di e manera ey bira un nacion hopi mas competitivo, un modelo pa resto di mundo den termino di sostenibilidad. Figueres a splica cu e gran bentaha cu tin cu e rumbo aki, ta cu den e ultimo cinco añanan prijs di coriente genera cu combustibel a bin ta subiendo mientras cu e prijs di coriente crea cu recursonan renobabel – manera biento y energia solar – a bin ta bahando. Por lo tanto tin un argumento economico logico cu awendia ta permiti pa cambia e fuente energetico riba e islanan di mundo pa fuentenan renobabel , haciendo esaki un bon chens pa inversion pa sector priva, cu lo ta generando e cambionan. Na mesun momento bahando e prijsnan di energia na e islanan, haciendo e economianan hopi mas competitivo. E interes pa e trabou di Carbon War Room a bin ta creciendo na mundo. CWR a identifica sectornan di economia global caminda por baha e emision di carbon mientras cu na mesun momento e ta crea un bon oportunidad pa haci negoshi. Esaki ta masha importante, el a bisa, pa crea cuponan di trabou y oportunidadnan di inversion. Despues di e ultimo conferencia, 20 aña pasa, a logra e Acuerdo di Montreal pa elimina e problema di buraco riba capa di ozon, a expande e conocemento riba importancia di medio ambiente den bida diario, a identifica tecnologianan cu por yuda na baha emision di carbon. Awor e proximo 20 añanan ta decisivo den termino pa implementa loke cu sa caba por haci y riba tereno di energia tin hopi cu por wordo haci. Y sigui investiga loke nos no sa ainda con pa ehecuta. “Pero cu tur e talento cu ta haciendo investigacion, nos por bini cu mas solucion den añanan benidero.” Pa finalisa, e ex Presidente di Costa Rica a bisa cu e gran bentaha di awendia ta cu un 50% di e emisionnan di carbon cu no mester di ningun tipo di gobierno of financiamento, pa nan por wordo elimina. Pues nan por wordo elimina via bon practicanan di negoshi. Mester simplemente identifica nan y arma e coalicionnan pa ehecuta esaki. Y esaki ta loke ta haci cu e programa cu a wordo lansa cu Aruba, como lider riba e tereno aki, pero cu nan lo kier hiba pa otro islanan tambe.
Comentarionan (2)Mustra/Kita comentarionan ...
realidad ta cu te awe uso de energia for de fuentenan renobabel ta mas caro cu prijs di combustibel! prome cu core firma a algo mester analysa ta cuanto e acuerdo aki lo costa aruba? kiko ta e prijs pa ta e lider riba e tereno aki? Si twt asina barata anto nationan grandi lo a bay den e direcion aki caba. Ta bon pa como isla duna un bon ehemplo contal e no ta bay a costo di salario paso te awe no por a demostra con gastonan ta bay baha cu esaki. E ironia ta cu ta pidi islanan cuminsa duna e ehemplo cu ta un idea bunita pero e realidad ta cu tur e islanan riba mundo den total no ta produci ni 1% di e total producion di dioxido di carbon y otro gasnan toxico den atmosfera. Ta paisnan grandi ta produci 99% di polucion aki. Asinata mihor Brandson y Mike, si enberdat nan kier market nan mes como lider den e area aki, cuminsa convence e c*lpabelnan mas grandi esta China y Estados Undidos pa nan bira lider den e cambia aki.
,
June 21, 2012
Duna Comentario y/of Comparti riba Social Medi |
Mustra/Kita e formulario di comentario
