| Prome Minister Wescott Tabata masha importante pa Sint Maarten participa den Rio +20 |
 |
 |
| Thursday, 21 June 2012 14:41 |
 Como un isla nacion e diferente topiconan riba sostenibilidad ta importante pa Sint Maarten. Apesar cu e isla ta forma parti di e delegacion di Reino Hulandes, tin topiconan cu ta masha critico pa Sint Maarten tambe. Nan por a scucha e diferente presentacionnan cu tabata tin, tende cual ta e miho practicanan ora cu ta papia di energia alternativo, cambio climatico, provision di alimento, etc. Tur ta cosnan, e ta bisa, cu ta masha importante pa islanan chikito manera Sint Maarten. Pesey, aunke e delegacion di Sint Maarten ta uno chikito, tabata masha importante pa nan ta presente na Rio +20. Na Sint Maarten, e Prome Minister a bisa, mester mira con pa crea un balans entre medio ambiente y desaroyo economico. “Tur cos tin di haber cu sostenibilidad. Manera tur hende sa, Sint Maarten ta principalmente un destinacion turisitico y aunke e ta masha importante pa e desaroyo economico, di otro banda tambe kier mira e bienestar di su hendenan, e medio ambiente di Sint Maarten, na momento cu ta sigui promove e isla. Ta masha importante pa establece e balans ey entre e diferente sectornan di e comunidad pa yega na un desaroyo sostenibel.” Pa loke ta energia alternativa, esaki ta un tema rond mundo y pa Sint Maarten tambe e ta importante. Mester wak kico por haci y con por fit esaki den e comunidad, y aplica nan mientras cu ta mira riba desaroyo di e habitantenan. Pa loke ta e consecuencianan cu e isla aki ta ricibi den temporada di horcan, e Prome Minister di Sint Maarten a bisa cu e patronchi di clima a cambia asina inpredicibel, cu tur isla nacion den Caribe mester ta prepara. Despues di añanan azota pa horcan, un cos cu por bisa di Sint Maarten cu nan ta prepara pa e fenomeno di naturalesa aki. A tuma e proceso pa ta prepara pa cualkier eventualidad. Pesey a pone tur nan wayanan bou tera. Awor cu ta trahando riba energia alternativa, mester mira con por combina e dos sistemanan cu otro pa evita e dañonan grandi cu horcannan tabata causa antes na infrastructura. Pesey su presencia na Rio +20 ta importante, e Prome Minister di Sint Maarten a indica. Pa finalisa, el a splica cu el a sigui cu atencion, loke Aruba ta haciendo y a atende e tayer caminda Prome Minister Eman a papia. E ta kere cu e islanan lo por comparti pensamento y ideanan cu otro.
|
Mustra/Kita e formulario di comentario
