Wednesday, 23 April 2014
SIP ta condena asesinato di periodista na Mexico y ta pidi pa investigacion Print E-mail
Monday, 19 November 2012 13:06
DSC_2063
E Sociedad Interamericana di Prensa a pidi autoridadnan di Mexico pa investiga cu urgencia pa conoce e motibo y duna responsabilidad pa e asesinato di e reportero Adrian Silva Moreno, cual hecho a tuma luga na Puebla.

Silva Moreno, periodista independiente cu tabata colabora cu varios corant local y un persona cu tabata wordo compaña pa Misrarel Lopez Gonzalez, a wordo asesina diaranson, dia 14 di november parti atardi, den e municipio di Tehuacan na Puebla, funcionarionan estatal a confirma.

E presidente di e Comision di Libertad di Prensa y Informacion y director di e semanario Busqueda, Claudio Paolillo, a expresa cu “nos ta condena e acto di violencia aki y nos ta urgi autoridadnan pa investiga di manera urgente e crimen aki pa sa e rason pakico el’a wordo cometi, identifica e responsabelnan y sometenan na husticia.”

Medionan local a relata cu Silva Moreno di 34 aña y Lopez Gonzalez di 27, tabata den un auto pa cubri un operativo militar ora cu, segun testigonan, a wordo intercepta y ataca pa por lo menos tres persona den un pick up.

E reportero a muri al instante, su cadaver a wordo haya cu varios impacto di bala, mientras cu Lopez Gonzalez, ex polis, a logra Sali for di e auto, pero a wordo alcansa pa e atakantenan cu a asesin'e cu un tiro na cabes dilanti di hopi hende cu tabata riba e caminda publico.

Silva Moreno tabata colabora y tabata cubri e fuente policiaco pa Global Mexico, Radio 11.70 di Tehuacan y e corant Puntual Puebla, entre otro medionan.

E aña aki otro seis periodista a wordo asesina na Mexico: Victor Manuel Baez Chino, Gabriel Huge, Guillermo Luna, Esteban Rodriguez y Regina Martinez na Veracruz y Marcos Antonio Avila Garcia na Sonora.

SIN CONOCERSE PARADERO DE PERIODISTA

SIP tambe a reclama autoridadnan Mexicano pa e desaparicion di e periodista Adela Jazmin Alcaraz Lopez, cual paradero ta desconoci for di dia 26 di October ultimo. Aclaraz Lopez ta conductora di e noticiero di e Canal 12 di kabel di e municipio di Rioverde, den e estado di San Luis Potosi.

E secuestradonan tambe a captura e dos yiunan chikito di e periodista, kendenan a wordo libera posteriormente. Autoridadnan no tabata por a establece si e desaparicion ta coresponde na vinculonan cu su actividad periodistico.

Otro periodistanan cu a desaparece e aña aki na Mexico ta: Miguel Morales Estrada na Veracruz; Zane Plemmons na Tamaulipas y Fedeerico Manuel Garcia Contreras na San Luis Potosi.

SIP ta un entidad sin fin di lucro dedica na defensa y promocion di libertad di prensa y di expresion den e region Americano. E ta wordo componi pa mas di 1300 publicacion di e hemisferio occidental y tin sede na Miami, Merca.

 

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter