| Enseñansa liber ta esensial pa un mihó alfabetisashon na kòrsou |
 |
 |
| Friday, 07 September 2012 17:07 |
 Awe dia 8 sèptèmber 2012 un biaha mas ta selebrá ‘Dia Internashonal di Alfabetismo’, e aña aki ku e tema ‘Alfabetismo i Pas’. Nashonnan Uní a proklamá e dia aki na aña 1965 i mundu tin mas di 45 aña ta selebré, mirando e gran importansia di alfabetisashon.
E tema aki ta unu sumamente relevante, mirando e uso multiple i balor ku alfabetismo tin. Alfabetismo ta kontribui na pas, ya ku e ta trese hende mas serka na alkansá libertat individual, mihó komprendementu na mundu i tambe e ta yuda evitá i solushoná konfliktonan ku surgi. Na e okashon aki Presidente di Parlamento di Kòrsou, Sr. Ivar Asjes, a mustra ku enseñansa i desaroyo ta kumisá ku alfabetisashon i komo tal alfabetisashon ta kontribuí direktamente i ta un hèrment esensial pa desaroyo sosial di e hende, pero tambe di e komunidat. Ku otro palabra, alfabetisashon ta kontribuí na un mihó kombibensia. “Alfabetisashon ta un nesesidat humano ku tur hende tin derechi riba dje, algu ku a keda rekonosé 60 aña pasá pa Nashonnan Uní. Un hende ku no ta alfabetisá por lo tantu no tin oportunidat pa studia i eduká su mes.”, asina Presidente di Parlamento Asjes a duna di konosé riba e importante dia aki, agregando ku alfabetisashon komo esensia di edukashon básiko ta yuda eradiká pobresa, redusí mortalidat infantil, yuda plania famia, logra igualdat di género, promové rèspèt entre hende i tambe yega na desaroyo duradero, pas i demokrasia. Según Asjes, e gruponan ku mas problema tin di alfabetisashon i desaroyo edukashonal na mundu ta esnan ku ta biba den pobresa. “Sifranan mundial ta mustra ku tin kasi 800 mion hende na mundu, di kual dos tersera parti ta hende muhé, ku no ta alfabetisá a konsekuensha di pobresa i miseria”.
|
Mustra/Kita e formulario di comentario
