| Konseho Supremo Elektoral ta publiká listanan di kandidato bálido pa Elekshon próksimo |
 |
 |
| Monday, 17 September 2012 20:00 |
|
En konekshon ku Elekshon pa Parlamento 19 di òktober 2012, dia 17 di sèptèmber último Konseho Supremo Elektoral di Kòrsou (KSE) a tene un reunion públiko pa loke ta trata aprobashon di listanan di kandidato i mantenementu di kandidatonan riba listanan. Ku e análisis aki KSE ta nota si kandidatonan ta kumpli ku e rekerimentunan stipulá den Kiesreglement. Te ku djabièrnè 14 di sèptèmber último partidonan polítiko ku ta deseá na partisipá na elekshon próksimo, tabata tin e oportunidat di drecha detayenan riba nan listanan. Ta trata aki di detayenan personal manera nòmber, adrès, fecha di nasementu ku di un manera òf otro no tabata igual na esnan ku Registro Sivil tin den su registro. E listanan ku despues di e revishon finalmente ta kumpli ku e rekerimentunan stipulá den Kiesreglement, a keda akordá pa partisipá na elekshon próksimo. Ta trata aki di partidonan Pueblo Soberano (PS), Partido Democraat (DP), Partido Alternativa Real (PAR), Partido MAN, Partido Nashonal di Pueblo (PNP), Frente Obrero Liberashon 30 di mei (FOL), Movementu Futuro Kòrsou (MFK) i Partido pa Adelanto i Inovashon Soshal (PAIS). Tur kandidato por keda riba nan respektivo lista pues no tabata tin motibu pa ekskluí ningun despues di e revishon. E lista di Partido Aliansa Nobo (PAN) a keda deklará inbálido ya komo e no a risibí e kantidat di voto di sosten pa partisipá na elekshon. Despues ku esnan presente na e reunion no tabata tin ningun opheshon kontra di e desishon menshoná, KSE a sera e reunion ku firmamentu di e prosès verbal. E siguiente reunion públiko lo ta djaweps próksimo 20 di sèptèmber pa 10or di mainta den sala matrimonial di Kranshi den kual lo trata numerashon i koló pa partidonan polítiko. |
Mustra/Kita e formulario di comentario
