| Elekshon ta e máksimo ekspreshon den un demokrasia |
 |
 |
| Thursday, 20 September 2012 17:02 |
 Awe, 21 di sèptèmber 2012, ta Dia Internashonal di Pas, dekretá pa Nashonnan Uní fo’i aña 1981. Durante di e konferensha ku Nashonnan Uní a tene e aña aki na Rio de Janeiro, Brasil, e lidernan mundial huntu ku organisashonnan sosial i empresanan privá a ratifiká nan kompromiso polítiko di tèrmino largu enkuanto desaroyo sostenibel. P’e motibu aki mes a disidí ku e tema pa Dia Internashonal di Pas e aña aki lo ta ‘un pas sostenibel pa un futuro sostenibel’.
Luna di sèptèmber tin otro fecha hopi importante ku nos ta selebrá i ku ta direktamente ligá ku esun di awe. Ta trata di Dia Internashonal di Demokrasia ku a keda dekretá 4 aña pasá pa Nashonnan Uní, ku a pidi tur País miembro, organisashonnan Gubernamental i no-Gubernamental di Paísnan di mundu, pa konmemorá e dos dianan aki komo tal. Ta p’esei luna di sèptèmber ta wòrdu internashonalmente konsiderá komo e luna di Demokrasia i Pas. Presidente di Parlamento, Sr. Ivar Asjes, n’e okashon aki ta kontentu ku Pueblo di Kòrsou tin e dicha di ta biba den un País demokrátiko, kaminda Pueblo ta skohe su representashon Parlamentario; algu ku no ta eksistí na tur parti di mundu ainda. “Dia 19 di òktober awor tin elekshon na Kòrsou, e máksimo ekspreshon i ratifikashon di demokrasia den nos País, ora duna Pueblo oportunidat pa ehersé su derecho sagrado di ekspresá su pensamentu i disidí ki rumbo Kòrsou mester kue pa e próksimo 4 añanan. Kualke intento pa stroba esaki ta un akto anti-demokrátiko masha peligroso pa nos demokrasia i e espíritu di Pas na Kòrsou”, asina Presidente di Parlamento Asjes a indiká. Pa Asjes, demokrasia ta un balor universal basá riba e boluntat liber ekspresá pa Pueblonan pa determiná nan propio sistema polítiko, ekonómiko, sosial i kultural i partisipashon pleno den tur aspekto di bida. Di su banda Pas ta e derecho ku tur País i di fakto tur hende tin pa por ko-eksistí den trankilidat i gosa di nan demokrasia. Ta p’esei nos mester traha duru i sigui mehorá e estado di derechi demokrátiko di Kòrsou dor di hasi nos demokrasia representativo unu mas partisipativo, kaminda Pueblo ta haña mas influensha den gobernashon.
|
Mustra/Kita e formulario di comentario
