| Eksploshon ku herido i morto na Kruithuis |
 |
 |
| Sunday, 16 December 2012 17:23 | ||||||||||||
|
Djasabra, 15 di desèmber 2012, alrededor di 14.46’or Sentral di Polis a risibí yamada ku tin un eksploshon a tuma lugá na e edifisio destiná pa abastesé vürwèrk (Kruithuis) na Seru Loraweg i ku tin vários persona herida. Mesora a dirigí diferente patruya polisial, SKS, Brantwer i ambulans na e sitio pa duna asistensia. Fiskal di Ministerio Públiko tambe a yega na e sitio. Na yegada di e patruya na e sitio, nan a konstatá ku e edifisio menshoná i tres(3) vehíkulo banda di e edifisio ta na kandela i ku tin diferente herido alrededor. Mas aleu nan a konstatá ku un edifisio ku ta keda banda di e ‘kruithuis’ tambe su dak a pega kandela. Na e sitio tin un kantidat di kònteiner será ku ta kontené vürwèrk. Relato: For di un investigashon preliminar ku polis a hasi na e sitio, nan a komprondé ku un ratu promé tabatin un kantidat di persona presente na e ‘kruithuis’ pa entre otro trabounan di limpiesa ku tabata tumando lugá pa deshasí di vürwèrk bieu pa traha lugá. Dado momento esnan presente (i un parti grandi di Kòrsou) a tende un eksploshon hopi fuerte i e edifisio di ‘Kruithuis’ a rementá por kompleto. Tantu e dak komo e murayanan di e edifisio a basha abou i bula bai kai na un distansia. E mayoria víktimanan a kuminsá kore bai for di e sitio, algun ku herida di gravedat. Mesora e instansianan konserní a kuminsá mobilisá i a kuminsá duna asistensia na e víktimanan, paga e kandela/evitá mas eksploshon i evakuá e área. Un ratu despues personal di Rode Kruis, Milieu Dienst, Veiligheid Dienst, Arbeids Dienst i Slachtofferhulp a yega na e sitio i a kuminsá ehersé nan trabou. Ku ambulans i den vehíkulo privá e víktimanan a keda transportá pa Poliklínika di Hospital pa tratamentu médiko. Kontinuando ku e investigashon a haña un kurpa sin bida na e sitio di e insidente kaminda e eksploshon a tuma lugá. E víktima aki a keda identifiká komo:
Alrededor di 15.55’or un dòkter a konstatá morto di e víktima aki. Mas aleu shete (7) persona a presentá na Poliklínika pa haña tratamentu. Di e shete nan ei, tres (3) por a bai kas i kuater (4) a keda interná den hospital di kua unu(1) su situashon ta di preokupashon i dos(2) tabata di hopi preokupashon. Mas lat un di e víktimanan, un hòmber di 50 aña di edat a bolbe bai bèk poliklínika despues ku e la haña tratamentu i por a bai kas. E la keda interná pa mas tratamentu médiko. Na e momentunan aki tin un persona ainda den hospital na Kòrsou pa loke ta trata e kaso aki. Djasabra 15 desèmber 2012 alrededor di 18.45’or hospital a informá polis ku un di e víktimanan ku ta interná den hospital i ku su situashon tabata di hopi preokupashon a fayesé komo konsekuensia di e heridanan (kemadura) ku e la risibí:
Djadumingu 16 desèmber 2012 alrededor di 06.25’or hospital a informá polis ku e di dos víktima ku su situashon tabata di hopi preokupashon i ku ta interna den hospital a fayesé komo konsekuensia di e heridanan (kemadura) ku e la risibí:
Riba òrdu di Fiskal di Ministerio Públiko a konfiská tur tres(3) kurpa sin bida pa mas investigashon. E sitio di e insidente i su alrededor a keda será pa públiko te den oranan di anochi. Despues a habri Seru Loraweg i a mantené e sitio di e insidente hermétikamente será pa investigashonnan tékniko ku mester/ta tuma lugá. Mas aleu Kuerpo Polisial a pone un number di telefon 866-6124 i 911 disponibel pa personanan ku a haña daño na nan propiedat por registrá esaki. Te na e momento aki nos a haña kuater(4) kaso. (bentana kibrá, frame di aluminio doblá, antena a sufri daño). Kuerpo Polisial ta ekstendé su profundo sentido di pésame na famianan di e víktimanan ku a fayesé i forsa na esnan ku ta rekuperando. Tambe nos ta gradisí un i tur ku di un forma spontáneo a bin duna un man i/òf a duna sosten pa por a hasi e trabounan na bienestar di nos komunidat. Nos ta gradisí nos medionan di komunikashon tambe pa e koperashon ku nos a haña. Tep: Ta supliká tur persona ku ta kere ku nan tin informashon riba e kaso aki, pa pasa e informashon aki pa Reshèrshi na numbernan: 8666-119/ 8666-221(ora di kantor) òf 911 (24 ora pa dia). Number anónimo: 108 (e number aki ta duna tur garantia di anonimidat).
Comentarionan (5)Mustra/Kita comentarionan ...
Tristo pa wak kico negligencia politico a haci paso SI a haci e cambionan necesario segun e rapport cu tin anjas warda anto e incidente aki por a wordo evita of minimalisa. Ban wak kico ta bai sosode awor. Condolencia na famianan di e fallecidonan. Por wak cu e edifcionan ta data for anjas atras.
,
December 16, 2012
...
Tuma ejemplo di Aruba unda vuurwerk ta wordu warda lew di tur negoshi y publico. Precies kiko a pasa nos no sa ajinda pero ta entendi ku esaki a wordu sendi intensionalmente ku kandela kual den un situashon asina ta dificil pa evita ya ku vuurwerk ta reaciona mes ora ku candela.
Tambe mi ta desea Sr. Danny Herodini hopi forza y un pronto recuperashon.Mi mas sincero pesami na e famia nan di esun nan ku a perde nan bida.
,
December 16, 2012
...
Segun rumor ta kore ku malechornan lo mester a tira kandela riba e personal ku tabata na e kruithuis. kiko tin di berdat tras di esaki ?
,
December 16, 2012
Duna Comentario y/of Comparti riba Social Medi |
Mustra/Kita e formulario di comentario
