Mientras tur caminda rond di nos isla pueblo di tur districto y tur bario ta pidi pa gobierno di AVP drecha e cayanan, pone lus y mehora e infrastructura di nan bario, e lider y miembronan di MEP ta keda critica e proyectonan aki y yama nan gastamento di placa. Den tur reunion cu miembronan di partido AVP tene, den tur combersacion, e tema cu mas ta sobresali, ta e deseo di pueblo pa gobierno drecha e infrastructura di nan bario.

Samantha Westera-Juppa ta director artistico di Club di Movimento cual ta un school di baile hopi reconoci aki na Aruba. Ta asina cu for di varios luna caba Club di Movimento ta trahando riba un proyecto hopi bunita cu ta consisti di un intercambio artistico entre e muchanan di Aruba y Brazil. Segun Westera-Juppa, e laso aki entre Aruba-Brazil a cuminsa for di 2008, ora cu Club di Movimento a bay participa den un presentacion na New York.

Recientemente Minister di Asuntonan Economico, Asuntonan Social y Cultura Michelle Hooyboer-Winklaar a habri e exposicion “Shoco, Rey di nos Mondi” di Kinderatlier Aruba CreaArte. Minister Hooyboer-Winklaar a gradici Miriam de L’isle pa e trabao valioso cu e ta haciendo cu su alumnonan y su dedicacion na siña nan diferente disciplina artistico.

Minister Mike de Meza tabata presente den parlamento como minister encarga cu Lotto. Den combersacion cune el a splica cu desde nan a drenta gobernacion tabata papia cu Lotto mester enfoca riba su negoshi principal cu ta loteria. E mandatario a bisa cu nan a pidi di Lotto un bon administracion y pa e placa cu resta mande pa minister responsable pa deporte cu ta esun autoriza pa maneha e fondonan aki.

Gobierno di Aruba ta kere den crecemento economico den combinacion cu reduccion di gasto. Un diferencia grandi den vision cu e gobierno anterior cu semper a scoge pa bin cu medida entre otro introduciendo impuestonan cu Aruba a conoce na varios ocasion.