Peruanonan votando na Aruba

Sunday, 05 June 2011 15:11

Den cuadro di e di dos buelta di eleccion na Peru, e comunidad Peruano a sali diadomingo pa deposita nan voto aki na Aruba. Un representante di Consulado di Peru di Venezuela a bin Aruba pa supervisa e proceso. Peruanonan tin te cu 4or di atardi pa por vota na e restaurant situa na e prome piso di Hotel Victoria den Caya Betico Croes. Un total di 720 Peruano residencia na Aruba tin derecho di voto, di cual 150 di nan a nacionalisa Hulandes net despues cu a cera e lista electoral, pues nan lo no por vota mas.

Ta keda 570 Peruano biba na Aruba cu si lo por vota entre e dos candidatonan pa bay cu e puesto di Presidente di e pais. Ta trata aki di Keiko Sofia Fujimori Higuchi di e partido Fuerza 2011 of tambe pa Ollanta Moises Humala Tasso di e partido Gana Peru. Keiko ta yiu muhe di ex presidente Fujimori, mientras cu encuestanan tur a duna Ollanta Moises Humala Tasso un miho oportunidad den e di dos buelta. Te den oranan laat di merdia, mas di 200 Peruano biba na Aruba a haci uzo di nan derecho di voto. Ta pensa cu prome cu 4or hopi lo stop di traha y core pasa deposita nan voto pa nan tambe forma parti di e proceso electoral di nan pais.

Peru, of oficialmente yama “Republica del Perú”, ta situa na e parti zuid di Sur America y ta frontera cu Ecuador, Colombia, Brazil y Chile. Na aña 1821, Peru a logra su independencia for di Spaña pero den e añanan cu a sigui a confronta hopi reto manera disturbio politico y crisis fiscal, mescos tambe tabata temponan di instabilidad politico y economico. Peru ta un republica democratico representativo dividi den 25 region. E populacion Peruano ta estima na 29.5 miyon habitante cu ta inclui Amerindians, Europeonan, Africanonan y Asiaticonan. E idioma mas uza ta Spaño pero un cantidad significante di Peruano ta papia Quechua y algun otro idioma nativo.

E mescla di tradicionnan cultural a resulta den un diversidad grandi di expresionnan riba tereno di arte, cuminda, literatura y musica. Papiando di gobernacion, Peru tin un democracia presidencial representativo den cual e Presidente ta cabes di estado y di Gobierno durante un periodo di 5 aña y por wordo re eligi despues cu e keda un periodo completo for di gobernacion. E Presidente mes ta asigna e Prome Minister y cu su conseho, ta scoge e demas miembronan di e Conseho di Minister.

Aparte di Gobierno, Peru conoce un congreso den cual tin 120 representante eligi pa un periodo di 5 aña. Leynan por wordo proponi door di Gobierno of Congreso pero ta drenta na vigor solamente despues di pasa Congreso y anuncia dor di Gobierno. E sistema hudicial, entre otro e sistema di Corte, ta traha independiente pero den historia di Peru y ainda na mas di un ocasion a yega di tin confrontacionnan pisa dor di intermediacion di politica den e sistema hudicial.