|
Minister Dowers: Pabien na nos alumnonan, nan famia y maestronan |
 |
 |
|
Thursday, 14 June 2012 19:36 |
|
Na tur scol secundario alumnonan di examenklas, nan famianan y amigonan a reuni pa e develo di loke ta conoci popularmente como e "lista di nomber". Minister di Husticia y Enseñansa a atende e ceremonia aki na Mon Plaisir College unda cu ela warda cu pasenshi cu otro mayornan pa e momento importante aki den bida di nan yiunan.
Felismente, e nomber "Dowers" tabata entre e graduadonan. Minister Dowers tabata hopi satisfecho di wak tambe cu hopi di e compañeronan di su yiu, como tambe pasobra el a haya bon noticia di diferente mayornan y scolnan rond Aruba cu e resultadonan tabata hopi bon y positivo pa hopi hoben. Minister Dowers sinembargo prome cu tur cos kier a manda un mensahe na e studiantenan cu no a slaag y esunnan cu mester haci herexamen ainda. Pa esnan cu mester haci herexamen el ta manda un mensahe di animo, pa nan sigui motiva, traha duro y "no give up". Y na esnan cu mester ripiti e ultim aña di scol secundario, e mandatario a pidi nan pa sigui padilanti, keda na scol y a deseanan hopi exito y animo. "E papel ey den bo man ta habri caminda pa bo sigui desaroya bo mes," el a enfatisa. "E esfuerso grandi di e muchanan y nan famianan awe a wordo corona cu nan diploma," e titular di enseñansa a remarca. El a añadi un felicitacion special na e maestronan specialmente y e scolnan en general pa cu e resultadonan positivo. Un factor principal den e resultadonan cu a bin padilanti ta e dedicacion di e maestro, Minister Dowers a comenta. El a bisa cu e maestronan ta haci hopi esfuerso y cu e ta haya cu maestronan na Aruba ta mas y mas motiva y ta participando cada biaha mas na diferente programa y proyecto cu ta wordo presenta na nan. Minister Dowers a expresa cu despues di e resultado final, pues despues cu haya resultado di e herexamennan tambe, lo por ofrece un bista completo di con nos scolnan ta prestando, pero cu ya caba por a mira hopi cifra positivo y alentador.
 |
Mustra/Kita e formulario di comentario
