Bishita di artistanan na exposición internacional di arte na New York City

Friday, 15 June 2012 13:16

Diferente artistanan ya a sali pa representa nan pais na e exposicion magno jama: Caribbean: Crossroads of the World. Aki mas cu 325 artista di diferente decadanan di tempo ta presenta nan obra den El Museo del Barrio, Queens Museum of Art y na The Studio Museum in Harlem.

Pa yega na un exposicion a organisa na diferente pais den Caribe exposicionan di arte caminda a escohe e artistanan cu mas a cai den e ramo di loke e curadornan di arte kier conta di e diversidad unico cu tin den Caribe. Hopi artista no a haya chens debi na e limitacion di espacio na e museonan. E curadornan a haye hopi dificil pa hasi nan excohencia debi na e calidad interesante di arte di Caribe. No solamente artista bibando den Caribe , sino tambe di e diaspora, e paisnan caminda hopi hende di Caribe ta biba manera Europa y Merca. Den e expo bo por mira e historia di Caribe tambe dor di e wowonan di e exploradornan di añanan 1700 y 1800 cu tawata trece artistanan grafico y pintornan pa por demostra e paisaje y e hendenan di Caribe, incluyendo e indjanan di Caribe.

Di Aruba tin un grupo interesante di artista cu a wordo invita pa representa Caribe Hulandes cu entre otro artistanan di Curaçao. Maske cu e representacion di Curaçao ta mas cu triple di Aruba toch a logra haya un representacion digno y diverso. E pintura perla den e expo ta di Toton Quandt, un di nos artista nan historico cu a explora arte y e estilo surrealistico. Artistico Ciro Abath a presenta su obra jama "Disc" cu a dorna e entrada di e exposicion na El Museo del Barrio. "Disc" ta un disco di ceramica den color di lamina di oro den forma di glazuur cu ta trata e tema di intercambio fisico y spiritual importante cu tawata tin entre Europa, e paisnan Caribense y e mundo nobo. Fascinante ta cu Padu Lampe a wordo reconoce como un di e pioneronan di arte den su epoca caminda cu Padu tawata un di e promernan cu a representa Aruba na New York den su epoca. Awe nos por ta orguyoso, mas ainda, di por mire den Queens Museum of Art despues di tanto tempo atrobe. Osaira Muyale di Galeria StudiO den Stadionweg tambe tin un installacion di arte den El Museo del Barrio caminda cu e tin un obra di neon usando palabranan poetico pa discribi e parti humano importante di nos sociedad pa por compronde otro mihor y eleva nos mes asina. Artista Elvis Lopéz tambe ta representa Aruba na Queens Museum of Art. E joven di e team ta Ryan Oduber cu a caba di jega bek for di Hulanda caminda cu e tawata tin e privilegio di a representa Aruba den e Caribisch expositie: "Who More Sci-Fi Than Us" na museum de Kade na Amersfoort cu su obra "Kima Momo" cu ta consisti di un video potret di un cara jena cu mas di 4000 payette di carnaval. E video ta dura 4 minuut y mei. E obra aki a wordo estrena na Washington DC bow di e exposicion Micro Cosm di e curador Aruba Renwick Heronimo cu ayudo di entre otro UNOCA y Minister di Cultura Michelle Hooyboer Winklaar. Kima Momo ta trata e tematica di machismo y con hundu e ta graba den nos cultura y con e ta afecta e sociedad. Rob ter Haar [Aruba/Hulanda] a presenta su video art cu ta trata e sentimentonan di e pasahero den su propio pais, esta Aruba y Hulanda. E artistanan cu a logra bin New York a wordo ricibi na e consulado general di Hulanda na Merca Rob de Vos y e consul voor pers en culturele zaken Mr. Arthur Kibbelaar caminda nan a elogia e perseverancia di e artistanan Arubiano y con bon nan ta wordo representa na Merca dor di Minister plenipoteciario Jocelyne Heronimo-Croes na Washington DC. Sra Heronimo-Croes na su banda a duna palabra di elogio na e artistanan y pone un vision interesante pa cu e futuro collaboracion di arte den Caribe y na Merca. Sr. Arthur Kibbelaar a discuti e posibilidadnan di unificacion di e artistana di Corsow cu di Aruba. Na e meet and greet tawata tei tambe Nicole Henriquez di Galeria Bloemhof, Corsow, Poppy Verboom di galleria Alma Blou na Corsow, historiadora di arte y curadora Jennifer Smit di Korsow. Consulado general a sera e meet and greet pa enfoca cu nan ta aki pa sirbi e artistanan si nan lo kier explora kiko Merca / New York tin pa ofrece e Arubianonan como e capital prinicpal di arte.