Apertura di exposicion “Reconocimento pa heroenan Caribense”

Friday, 15 June 2012 14:18

Reconocimento pa e participacion den resistencia di e ‘Hulandesnan for di West y Oost’ durante Segunda Guera Mundial, ta e meta cu Comité 4/5 mei di Amsterdam Zuidoost kier logra cu e exposicion di e tres heroenan di Caribe: Boy Ecury di Aruba, George Maduro di Curaçao y Anton de Kom di Surnam

Minister di Enseñansa y Husticia sr. Arhur Dowers y Minister Plenipotenciario sr. Edwin Abath conhunto a haci acto di apertura oficial di e exposicion aki den bibliotheca di Amsterdam Zuidoost. “Nan a paga pa nan participacion den resistencia cu e prijs mas halto: Nan bida! Nan no a haci esaki den nomber di Aruba, Curaçao, Surnam of Hulanda, pero pa paz y husticia. Pesey mi ta sumamente orguyoso di nos compatriota Boy Ecury. El’a bin Hulanda como un studiante y ora guera a cuminsa el’a keda tras. Sigur e tabata tin e opcion pa e regresa Aruba cerca su famia, pero ela dicidi di uni su mes na e resistencia. Ta nos tarea pa conscientisa nos hobennan cu paz y husticia no ta balornan di mes y cu ta pesey Boy Ecury, George Maduro y Anton de Kom a paga e prijs di mas halto. Esaki ta e sacrificionan cu no mester wordo lubida hamas!” Minister Plenipotenciario a bisa emociona.

Minister Dowers y Minister Plenipoteciario Abath ambos tabata tin un boton bisti cu e palabranan cu Boy Ecury a bisa despues cu ela wordo traiciona y aresta dor di e Alemannan. Aki e Alemannan a pone bao presion pa saca afo e nombernan di su compañeronan di resistencia, cu e promesa cu nan lo laga Boy Ecury regresa Aruba. E’la nenga di duna nan e nombernan bisando: “Den cas di mi mayornan no tin lugar pa un traidor”. Un dia despues Boy Ecury a wordo fusila.

Durante su discurso director di ‘Surinaams Inspraak Orgaan’sr. Roy Khemradj a conta cu parti Caribense di Reino tambe den diferente forma a contribui na e resistencia contra e invasornan. “E refinerianan di Aruba y Curaçao tabata e mayor distribuidornan di combustibel na e aliadonan, mientras cu Surnam tabata suminstra bauxiet.” E ta aplaudi e iniciativa di Comité 4/5 mei, cu di e forma aki ta duna e storianan aki un cara.

Cu e exposicion aki Comité 4/5 mei kier pa e conmemoracion y e memorisacion di e historia di guera mundial di Reino wordo manteni bibo y di e manera aki bira mas accesibel pa un publico mas grandi. E iniciadornan ta remarca cu Ecury, Maduro y de Kom ta ehempelnan extraordinario pa e generacion di awendia y pesey nan merece atencion permanente. Cu esaki no ta bai di su mes, a wordo demostra durante e conmemoracion anual na Loenen unda Comité 4/5 mei no ta wordo permiti pa pone un krans durante e ceremonia. Loenen ta unda Anton de Kom ta dera.

George Maduro tabata un ‘reserveofficier’ di Huzaren. Durante capitulacion ela wordo captura. Despues di a wordo laga liber el a uni su mes na resistencia. Den februari 1945 y na un edad di solamente 28 anja, ela fayece di tifus di mancha den campo di concentracion na Dachau.

Boy Ecury tabata tin solamente 22 anja di edad ora ela wordo traiciona y a wordo fusila den november di 1944 na Waalsdorpervlakte na Scheveningen. Poco prome cu liberacion, Anton de Kom a fayece den luna di april 1945 den campo Neugengamme di tuberculosis.

E kuadranan aki ta creacion di e pintor Hulandes sr. Herman Morssink. E exposicion por wordo bishita durante e luna di juni na biblioteca den Amsterdam Zuidoost (sucursal Reigersbos). Despues e exposicion lo por wordo bishita na entre otro

Cas di Aruba.