Durante intercambio placentero cu muchanan di scol na PACO IIJoseph Simcox: Aruba ta hopi vulnerabel pa cu su suministro di cuminda

Friday, 15 June 2012 16:34

Durante e di dos conferencia tocante obesidad, cu enfoke ariba obesidad infantil, tabatin un sesion masha interesante den tur sentido.

Meymey di salanan di conferencia yen di adulto y expertonan den diferente ramo manera nutricion, movecion, medicina, obesidad, malesa, tabatin un sala yena cu un publico hopi hoben, wowo y mente habri, cu hopi entusiasmo. E publico hoben a bin pa intercambia cu un experto mundial ariba matanan cu ta brinda alimento, un explorador botanico. E mesun entusiasmo di e muchanan a transcende tambe ariba e meneer aki, Joseph Simcox cu a goza di un intercambio hopi ameno cu nan.Sr. Simcox ta biaha mundo explorando cua matanan ta crece miho den ki areanan, cu cua clima y cultura. Asina sr. Simcox a yega Aruba y a topa cu Minister di Salubridad y Deporte, dr. Richard Visser pa ken e tabatin elogio, bisando cu Minister Visser a alcansa un strategia integral pa comemento saludabel.El a añadi cu sinembargo pa come saludabel hende mester compronde di unda nan cuminda ta bin y con e ta wordo prepara y hende mester bira activo den e proceso aki. Y esaki ta un cos cu pa via cu Aruba ta un pais bon para cu por importa su cuminda, nos muchanan no ta bastante consciente di dje. Ora sr. Simcox a puntra nan si nan sa di unda yoghurt ta bin, e contesta tabata "di un supermercado", pero nan no tabata consciente cu na final di dia, yoghurt tambe ta bin di baca.Nos tin aki un oportunidad increibel pa cambia futuro, sr. Simcox a bisa, splicando cu mester habri e bentana pa descubrimento pa nos muchanan.

Tabata asombroso con entusiasma nan tabata, sr. Simcox a bisa, contento.Sr. Simcox a splica e muchanan cu tur cos cu hende come ta bin di naturalesa y ademas, cu nan mes por crece nan mes cuminda den nan mes hardin.Aruba ta den un posicion hopi vulnerabel como cu 95 pa 99% di su cuminda ta wordo importa y si pa cualkier motibo tin un problema cu ta obstrui of preveni e cuminda aki pa yega Aruba, placa no lo ta basta pa resolve e problema aki, el a enfatisa. Aruba ta relativamente rico y e hendenan ta biba bon, pero e statisticanan ta alarmante, pasobra casi no tin cultivo domestico y casi no tin cuminda ta wordo cultiva pa e populacion, sr. Simcox a remarca.Aunke e clima di Aruba ta manera di desierto, e isla ta afortuna pasobra e ta un isla tropico y e clima ta duna pa por cultiva cierto producto cu ta crece bon den desierto henter aña. El a mustra e muchanan con mata y palonan cu ta produci cuminda por crece den desierto y pues tambe na Aruba y nan tabata hopi impresiona cu esaki.Aruba por bira un ehempel pa hopi pais cu e programa cu dr. Visser kier introduci pasobra e isla lo bira un ehempel di agricultura sostenibel, sr. Simcox a enfatisa.E hendenan, particularmente e muchanan, mester siña traha den hardin, mester hunga cu tera, mester conecta cu naturalesa, nos no por scapa di esaki, pasobra kico cu nos come ta bolbe na tera y mata, tur cos ta concerni mata, e ta un circulo grandi, e experto a splica.El a expresa cu e ta hopi contento cu e proyecto cu Minister Richard Visser ta introduciendo cu e hardinnan den scolnan basico na Aruba ta hopi importante y e ta entusiasma pa cu e resultadonan cu esaki por duna.