Jose Carlos Velazquez: Deporte na scol ta un prome paso pa yuda Mexico resolve problema di obesidad infantil

Friday, 15 June 2012 16:38

E problema di obesidad y sobrepeso y e consecuencianan di esaki na Mexico ta enorme. Jose Carlos Velazquez di Fundacion pa desaroyo di deporte escolar a splica na PACO II, e conferencia panamericano tocante obesidad cu atencion special pa obesidad infantil, cu Mexico ta number uno den obesidad infantil mundialmente y esaki ta pisa hopi ariba e presupuesto di salubridad.

E costo economico y social di obesidad pa Mexico ta hopi halto y un tercer parti di e presupuesto publico federal di salud ta wordo gasta na malesanan cu ta wordo causa pa obesidad y sobrepeso, sr. Velazquez a añadi. E fundacion di cual e ta un di e lidernan ta trahando duro pa introduci deporte na scol y cu esaki cuminsa traha den prevencion activo di obesidad pa desaroya un pais mas saludabel.

Sr. Velazquez ta considera PACO un conferencia di magnitud hopi importante pa su organisacion y ta pa prome biaha cu su organisacion ta presenta e informacion cu a wordo comparti aki.

Sr. Velazquez ta considera deporte na scol un strategia pa activacion di actividad fisico pa ataca directamente e problema di obesidad infantil. E ta di opinion cu deporte na scolnan mester bira un politica global y cu tur scol mester tin un programa pa yuda muchanan desaroya saludabel y na un forma cu ta faborece nan y e comunidad en general.

Activacion fisico ta beneficia hende homber y hende muhe, el a enfatisa. Na Mexico tin un problema grandi cu obesidad bao di muhenan y mester haya formanan creativo y diferente pa incentiva specialmente muhenan y muchanan pa move mas.

No ta sin mas cu hendenan lo cuminsa participa na actividad fisico of deporte, deporte mester ta dibertido, emocionante y atractivo, sr. Velazquez a enfatisa.

Asina e fundacion a crea entre otro un programa di television pa mucha cu ta motivanan pa bira mas activo, cu ta mustra muchanan cu ta activo den entrevista y reportahe. Ora un mucha wak un otro mucha na television e ta relata na e mucha y loke e mucha ta haci y kico a conduci cu el a wordo scogi pa ta den un programa di television, esaki ta un paso pa acerca muchanan activamente. Sr. Velazquez a conclui bisando cu mester uza tur e metodonan moderno di comunicacion, ademas di television, manera rednan social, medionan electronico y mas pa motiva e hubentud pa participa na deporte.