|
Diabierna y diasabra representantenan di gobiernonan y di organisacionnan den e ramo di entre otro salubridad, deporte y nutricion ta reuniendo na Aruba pa discuti e estado alarmante cu nan paisnan y regionnan ta bibando pa via di obesidad, sobrepeso y e malesanan cronico no comunicabel cu ta wordo causa pa obesidad y sobrepeso.
PACO II ta e di dos conferencia panamericano tocante obesidad, cu enfasis ariba obesidad infantil. E conferencia ta un iniciativa di diferente experto, pero esun cu a carga y pusha e iniciativa aki cu hopi determinacion te cu organisa e conferencia aki na Aruba ta Dr. Richard Visser, Minister di Salubridad y Deporte di Aruba. Dr. Visser pa hopi aña prome cu el a cuminsa cu su carera politico a haci diferente estudio y investigacion y a traha intensivamente den e area di prevencion di malesa y particularmente malesanan cronico cu no ta contagioso manera diabetes, malesanan cardiovascular y hipertension. E malesanan no contagioso, cronico mayoria tin nan rais den obesidad y sobrepeso, cual na Aruba ta di un nivel hopi halto. E cifranan cu a resulta di un estudio hopi extenso haci pa Dr. Visser tabata alarmante y mas cu nunca el a dicidi cu e tempo a yega pa cambia e futuro di nos populacion, pero tambe di otro paisnan cu tin problemanan similar. PAHO, e organisacion panamericano di salud y WHO, e organisacion mundial di salud a reconoce e importancia y necesidad pa trece expertonan ariba e tema di obesidad hunto den un conferencia anual cu nan apoyo pa PACO. E prome conferencia, cual a tuma luga aña pasa tabata hopi bon atendi y a conta cu presencia di expertonan y funcionarionan halto di diferente pais, incluyendo Merca y Canada ya den su prome salida. Pa medio di pusha e agenda den e bataya contra obesidad y sobrepeso y e malesanan cronico no contagioso, e Declaration di Port of Spain y e Aruba Call for Action a yega te na Nacionnan Uni, unda na un reunion di ehecutivonan halto a duna atencion special na malesanan cronico no contagioso. Esaki ta un muestra con importante e temanan aki ta mundialmente, pasobra e unico otro reunion ariba un tema di salud cu a yega di wordo organisa pa e ehecutivonan halto tabata tocante HIV/AIDS cu tabata considera un pandemia e tempo ey. Dr. Richard Visser tabatin e gran honor di papia na e reunion aki, un oportunidad unico y hopi significante, unda cu nomber di Aruba tambe a resona como un di e paisnan cu ta haciendo e maximo esfuerso pa tin un comunidad sano, como tambe pa bira un lider y ehempel den e guerra contra malesanan cronico no contagioso. E aña aki PACO II a cuminsa cu un siman di lectura, tayer y presentacion cu un lista ilustre di expertonan den tur ramo cu por y ta ofrece solucionnan efectivo pa combati obesidad. Hopi specialista y profesionalnan local cu ta activo den e diferente ramonan, como tambe publico general a atende e sesionnan di dialuna pa diahuebs. E reaccionnan tabata diverso, pero sumamente positivo y hopi hende a completa e dianan aki cu un lista personal di tarea y idea cu nan lo kier implementa den nan situacion diario, sea ta, entre otro, na scolnan, organisacionnan di deporte of den nan mes bida na cas y na trabao. Ariba diabierna y diasabra, e conferencia lidera pa PAHO y Minister Richard Visser mes ta tumando luga. Hopi informacion nobo a wordo comparti, mayoria storianan di exito y investigacionnan interesante tocante nutricion, movecion y prevencion. Dr. Richard Visser a expresa na apertura di PACO II diabierna mainta, "Nos mester cambia e wega pa gana e guera aki. Nos tin cu haci esaki pa e muchanan...pa e futuro generacionnan. Keda cu e pasion, keda cu e enfoke!"
 |
Mustra/Kita e formulario di comentario
