James Sallis na PACO II: Aruba ta ideal pa practica ciclismo, pero e infrastructura ta completamente planea pa coremento auto

Sunday, 17 June 2012 10:16

Sr. James Sallis, ken ta un profesor na University of California at San Diego, ta un di e oradornan na PACO II, e conferencia panamericano tocante obesidad. E tema cu el a papia ariba diahuebs tabata e beneficionan di coremento di bicicleta y diferente programa cu un pais of ciudad por introduci pa motiva su habitante y bishitantenan pa core bicicleta cu mas frecuencia.

Profesor Sallis ta bishitando Aruba pa prome biaha y el a observa cu nos isla ta un luga ideal pa encurasha mas hende pa core bicicleta y asina crea un cultura unda hende ta haci mas actividad fisico, como tambe ta yuda medio ambiente y ta spaar placa ariba nan gasolin. E distancianan na Aruba ta asina cortico cu basicamente un hende por tuma su bicicleta enbez di su auto pa bay hopi mas caminda, el a remarca. Pero tambe el a remarca cu e plan pa haci esaki mester ta multi strategico y aki Aruba tin hopi cambio pa haci pa loke ta trata infrastructura. Ta hopi bisto cu na Aruba henter e infrastructura ta dirigi ariba coremento di auto y no coremento di bicicleta ni tampoco canamento, e experto a observa. Sr. Sallis a expresa cu el a keda hopi sorprendi ora cu el a wak e cifranan y cu Aruba tin statisticamente mas obesidad cu na Merca y Merca caba ta malo. El a añadi, cu ora e mira cu e infrastructura no ta encurasha canamento ni coremento di bicicleta cual ta wordo considera transportacion tambe, e ta compronde cu esaki por ta un factor determinante pakico tin tanto obesidad. Mester cambia e prioridadnan di transportacion si un pais of ciudad kier motiva mas coremento di bicicleta y canamento, el a añadi. E pais of ciudad mester haci'e sigur, pues "safe" pa e ciclista y esun cu ta cana. Siguridad den trafico ta un factor determinante specialmente pa hende muhe ora nan ta tuma e decision pa core bicicleta. Asina tambe e ta influencia nan decision ora di laga nan yiunan core bicicleta ariba caya, e experto a comenta. Educacion di tur hende cu ta participa na trafico tambe ta un factor hopi importante, profesor Sallis a añadi. Cambionan asina ta tuma hopi aña, pero nan por wordo haci, sr. Sallis a bisa. E beneficionan ta hopi, incluyendo e impacto ariba medioambiente, trafico, gastonan di transportacion y por ehempel, na e isla di Kauai ta hasta nan ta asina leu cu e isla a cuminsa na atrae awo "bicycle tourism".